Ademas gobierno tin un responsabilidad cu gastonan cu a wordo haci pa e gobierno anterior.
ORANJESTAD – Bo por keda reclama, bo por keda yora, bo por keda bira bo cara, pero e realidad ta nos dilanti. Gobierno mester di ingreso pa asina nos por cumpli cu e deseo di nos pueblo, tin inversionnan cu mester wordo haci y e placa mester bin di un caminda. Nos como gobierno tin un responsabilidad caminda cu gastonan a wordo haci y mester wordo paga. No ta pornada e nomber di e ley aki tin PPP den dje asina Minister di Finanzas, Asuntonan Economico y Cultura señora mr. Xiomara Ruiz-Maduro a trece dilanti den sala di parlamento durante e reunion di crisisheffing.
E projectonan aki PPP, no ta tur a wordo acaba manera mester ta, ainda tin investigacionnan pasobra a mira stroman y strovrouw. Awe e ex-minister no ta sinta den parlamento, tur cos tin su motibo. E siman aki ta cuminsa un caso di un minister di e gobierno di AVP. Minister Ruiz-Maduro a trece dilanti cu nan tin tur confiansa cu ministerio publico lo haci su trabao pasobra door di e abusonan aki awe nos tin e crisisheffing, si den 8 aña gobierno a tuma decision manera mester ta, awe nos no ta den e situacion cu nos ta awe.
E debe di pais Aruba no a parachuteer, pero esaki ta debi na e mal maneho di e gabinete di Mike Eman caminda a redobla e debe nacional di pais Aruba. Gobierno mester di ingreso pa por cumpli cu e deseo di pueblo. Crisisheffing no lo mester a bini si e gobierno anterior a hiba un bon gobernacion.
Ta un berguensa cu miembronan di AVP cu participa y tabata den e gobernacion anterior, awe nan kier cuestiona MEP, cu si tin e curashi pa haci locual cu mester wordo haci y nan kier bin bisa cu partido MEP ta di medida. MEP ta un partido responsabel, formando parti di un coalicion cu ta mira cu e pais aki no por sigui den e rumbo caminda tabata hinke segun Minister di Finanza, Asuntonan Economico y Cultura.