Home » APA a haci tur preparacion necesario Freedom of the Seas, e di 14 crucero mas grandi di mundo a yega Aruba

APA a haci tur preparacion necesario Freedom of the Seas, e di 14 crucero mas grandi di mundo a yega Aruba

by Admin
0 comment 78 views

 

 

E di diescuatro barco crucero mas grandi di mundo a drenta haf di Aruba Ports Authority (APA) na Oranjestad cu 4537 pasahero abordo,  Freedom of the Seas, di e prestigioso linea crucero Royal Caribbean Cruiselines.

Manera ta conoci, APA recientemente a inverti den un proyecto di ‘dredging’ den haf di Oranjestad, unda cu a haci tur area mes profundo (12 meter), pa acomoda barconan di grandura manera Freedom of the Seas y facilita y haci e maniobranan mas facil.

 

Pa APA ta un orguyo pa mira con den transcurso di tempo e bon imagen crea cu e maneho hiba, a sigui trece barconan crucero popular pa Aruba, y cada biaha e tamaño di e barconan cu ta yega ta sigui crece. Freedom of the Seas ta e di cuatro barco mas grandi di mundo, despues di e ultimo barconan construi dor di e mesun compania manera Oasis of the Seas y Allure of the Seas. E crucero aki construi na Finlandia, den dimension di largura ta un poco mas grandi cu Titanic, pero den altura ta hopi mas halto cu 15 piso y 2800 cabina.

 

E por acomoda 4.515 pasahero cu ta wordo atendi pa mas di 1.360 tripulantenan.

Ta pa e tipo di e cruceronan aki APA a bin ta invertiendo den mehoracion di su infrastructura sigurando cu na tur momento cu oferta drenta, Aruba ta cla pa ricibi e hotelnan flotante cu ademas di luhoso, ta sigui crece den tamaño. Aunke cu esaki no ta e barco di mas grandi di pasahero cu a yega Aruba, mirando cu 2 di Augustus 2017 Carnaval Vista te na e momentonan aki ta esun cu ainda a trece e cantidad di 4875 pasahero pa Aruba. Sinembargo Aruba por ta orguyoso di ta atractivo pa compania nan cu por trece barconan di mas grandi di mundo cu un capacidad grandi di espacio di turistanan pa disfruta di nos isla.  

 

E vision di APA ta pa ofrece un producto di primera calidad na su clientenan, cu un infrastructura envidiabel pa cualkier pais grandi. Asina tin riba mesa un proyecto pa embeyecemento di henter e area di ex Free Zone cu awor ta den man di APA pa desaroya. Esaki den combinacion cu campañanan di promocion intensivo den exterior pa haci Aruba un haf hopi atractivo pa amantenan di crucero.

 

Cu yegada di Freedom of the Seas, treciendo mas di 4 mil persona en total, ta percura pa un bon inyeccion den economia di Aruba ya cu turistanan aki mayoria ta baha,disfruta  y bishita na diferente di e atraccionnan cu tin rond Aruba of simplemente haciendo compras den e variacion di ofertanan cu tin disponibel.

Pabien Aruba cu e logro grandi y positivo aki caminda APA ta sigui forma parti di  tanto e desaroyo turistico como economico di nos pais.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio