Sin duda ta bisto cu gobierno di coalicion ta haciendo un atraco riba cartera di nos hendenan, hendenan humilde, nos pensionadonan cu ta bay perde cierto suma cu nan ta hayando mensualmente, Parlamentario Mervin Wyatt Ras di fraccion di AVP a declara.
Igualmente nos hendenan cu ta cobra bijstand tin cu bay atende cu aumento di costo di bida cu lo wordo ocasiona dor di e aumento di BBO, prijsnan ta subi y nan lo no por cubri e aumento aki cu loke nan tin den nan cartera, pa pone man riba mesa pa nan famia y yiunan.
Parlamentario Mervin Wyatt Ras tambe a mustra cu e aumento di BBO lo bay afecta tambe mamanan soltera, nos hendnan handicap cu tin un uitkering y diferente grupo cu lo sinti e aumento aki como un sla formal di parti di gobierno.
Mas ainda gobierno ta dicidido pa bulldoze e ley aki sin sikiera a hiba consulta cu instancia y cu gremionan den comunidad, no ta tene cuenta cu ningun conseho riba e cambio aki y e forma di procede aki di gobierno, ta transforma parlamento den un ‘stempelparliament.’
E efecto di e cambio di ley aki gradualmente lo wordo sinti pa pueblo y Parlamentario Mervin Wyatt Ras ta kere cu mas tarda na luna di februari proximo pueblo lo ta sinti e peso di e aumento di BBO aki y na mes momento ta sigura cu partido AVP cu semper na tur momento a trata di alivia e costo di bida pa esunnan cu entrada limita, lo bay actua firmemente contra di e abuso aki.