Nos lo sigui informa pueblo cu e berdad y realidad
Partido MEP, dialuna anochi a tene un reunion informative den bario di Santa Cruz. Cede di MEP tawata yen na unda a nota cu tin hopi interes den pueblo pa e informacion cu MEP ta trece padilanti. Pa e motibo aki tambe MEP lo sigui informa pueblo cu e berdad y realidad. Di e manera aki, Partido MEP ta cumpli cu transparencia.
E reunion na Cede di MEP tawata impactante na unda e interes a surpasa tur expectativa. Un publico grandi a presencia e reunion aki. Y a haya e oportunidad pa haci pregunta y trece nan preocupacion padilanti. Un di e preocupacionnan di mas grandi ta e debe cu Aruba ta den.
Integrantenan di MEP a contesta tur pregunta y a comparti informacion importante di e desaroyonan den nos comunidad como tambe den gobierno. Ta importante pa pueblo comprende cu e crisis financiero cu Aruba ta aden awo aki ta un crisis traha pa Mike Eman y partido AVP. Cu MEP awo den Gobierno, e prioridad ta pa sanea e situacion financiero di nos pais pa asina laga un Aruba na unda por tin un desaroyo economico structural pa e siguiente generacionnan.
Lamentablemente no ta tur persona por a haya oportunidad pa haci pregunta of trece nan preocupacion dilanti publicamente. Sinembargo despues di a cera e reunion, e publico a acerca e candidatonan di MEP pa asina personalmente haci nan pregunta y papia di nan inkietudnan cu nan tin pa cu e pais.
E reunionnan informativo lo continua den diferente barionan di Aruba. Keda pendiente pa mas informacion tocante e proximo fecha y luga.