Gobierno actual no tin compasion cu ser humano
ORANJESTAD, Aruba : Parlamentario di Fraccion di AVP, Arthur Dowers, a haci un bishita na VNO y a topa cu representante di Hulanda. Pa 8 aña largo Parlamentario Dowers a traha cu e representante di Hulanda na momento cu e tabata Minister di Husticia. E representante actual di Hulanda ta esun cu e tempo ey nan a traha hunto unda tabata overleg cu e Ministernan di Husticia.
Parlamentario Dowers y e representante di Hulanda a pasa den hopi debate, discucionnan ariba tur tereno cu ta trata siguridad y e perspectivanan di siguridad den diferente parti di Reino. E encuentro tabata un momento unda cu por a refleha riba con a traha hunto den pasado, pero tambe riba e perspectivanan pa futuro.
Fraccion di AVP ta bishitando diferente gremio den comunidad, pasobra nan ta kere cu ta importante pa ora ta funciona den comunidad no solamente bo ta duna bo opinion, pero tambe ta scucha opinion di otro hende. Ta scucha nan punto di bista, uza nan sentimento cu ta biba den sociedad pa asina ey formula bo oposicion mas miho cu ta posibel.
A papia riba con antes a traha riba siguridad y e Parlamentario tin su preocupacionnan. Den e ultimo dianan aki e gobierno di e pais aki ta mustra masha poco compasion cu e ser humano y el a constata cu un atraco a tuma luga e siman aki. Personanan liga na gobierno, personanan cu ta responsabel p’e public relation di gobierno a sali y ataca e victimanan, di cual esaki ta algo di lamenta. E cos aki ta algo nunca bisto den e pais aki. Si tene cuenta, tur gobierno ta traha na bienestar di e pueblo, ta pone pueblo central. Esaki ta un gobierno cu a bin bisa cu ta pone e ser humano central, pero a atraca un famia unda cu tin mucha chikito a presencia acto di violencia di grado, anto hendenan liga na gobierno, specificamente trahado cu ta liga na partido POR ta sali y ta lastra hendenan manera cu nan a haci. Y sin niun escrupulo a trapa riba e sentimento di hende.
Esaki ta algo cu a yega na un “diepte punt” nobo pa loke ta trata e contacto di ser humano na e pais aki. E gobierno aki ta conoci pa ta un gobierno cu a gaña pueblo di Aruba den un forma dramatico cu nan lo pone pueblo central. Parlamentario Dowers ta kere cu ta importante pa denuncia esaki cu den comunidad, pa pueblo sa cu mester ta cauteloso y cu aworaki no tin un gobierno cu ta para na banda di nan. Cu no tin un gobierno cu sentimento p’e ser humano, cu no tin comprension y compasion pa hende. Pero pa no preocupa pueblo, tin un grupo grandi di hende, aunke cu por ta nan a sostene e gobierno aki, nan ta desaproba e tipo di actitudnan aki. Diferente persona a acerca Parlamentario Dowers, kendenan a indica di ta desaproba e forma di defama, ataca hende, di a bira victima.