Manera cu nos sa caba, Telearuba lo ta cumpliendo 55 aña di existencia na september proximo.
Ayera, hustamente riba Dia Mundial di Telecomunicacion, Minister Chris Romero a duna inicio na e programacion pa cu Mundial di Rusia 2018, cual lo wordo transmiti pa nos Planta Nacional di Television, Telearuba.
Na Aruba futbol ta un deporte hopi gusta y nos sa cu tin hopi fanatico di e diferente ekiponan participante e aña aki.
Y como un pais multicultural, logicamente na Aruba nos ta conta cu personanan originario di e diferente paisnan cu a clasifica pa e encuentro futbolistico di mas gusta na mundo.
Ayeranochi tabata un ocasion sumamente special tambe pasobra, entre otro, Telearuba a anuncia cu despues di Mundial Rusia 2018 lo bay sigui cu e transmision di e weganan di Major league Baseball.
Gabinete Wever-Croes tin como meta principal di semper duna apoyo na nos yiunan di tera, y teniendo esaki como prioridad, Telearuba lo enfatisa pa transmiti e weganan Xander Boogarts ta hunga, y logicamente lo presenta e weganan di tur ekipo gusta aki na Aruba.
Un otro anuncio importante cu a keda revela ayeranochi ta cu Telearuba lo duna inicio na un otro proyecto, cual ta e separacion di e programacion riba canalnan 13 y 23.
Canal 23 lo bira un entidad riba su mes, y lo bay mira programanan mas comercial, cuminsando cu Mundial Rusia 2018, mientras cu Canal 13 lo mantene su obhetivo principal, esta di promove nos eventonan cultural y deportivo localmente.
Esaki ta era nobo di Telearuba! Nos ta introduci innovacion, pero semper manteniendo como prioridad nos cultura y identidad.