Esaki ta e consecuencianan ora hende ta bay tras di tur loke wordo broadcast riba whatsapp, facebook, Twitter, Instagram of riba youtube etc etc. cu sigur ora no ta sali di un canal oficial.
Oranjestad: Diahuebs for di prome cu 7’or di mainta e trahadornan di DIMAS a wordo sorpresa cu mas cu 200 Venezolano ilegal para den fila dilanti di e portanan di DIMAS, te hasta e trahadornan mes no por a drenta nan oficina pa motibo cu nan no por a ni pasa yega na e porta.
Mas cu 200 venezolano ilegal a bay busca amnistia na DIMAS
Na prome instante a bisanan cu lo tuma nan datos paso no tabata sa kiko ta pasando, durante oranan di mainta mas y mas persona ilegal a aglomera dilanti e oficina di DIMAS, segun e personanan aki nan lo a haya un Broadcast via whatsapp bisando cu e mainta aki pa nan bay DIMAS paso Gobierno di Aruba lo bay duna amnistia na e venezolanonan cu ta bibando ilegal riba nos isla. Otro kemen cu ta na radio un persona lo a broadcast esaki.
Gobierno a desmenti
Durante dia Gobierno di Aruba a desmenti esaki, mandando e mensahe cla y raspa, cu actualmente NO tin ningun maneho di amnistia y tampoco NO ta procesa peticion pa asilo politico. E “mal joke” aki ta mustra algo bon planea, pa crea un situacion di chaos y confusion, hungando cu sentimento di hende y tratando asina di pone Aruba den un spot negativo internacionalmente, e noticia aki a sali te hasta riba NTN24.
Un “MAl JOKE” haci pa un persona cu mente maligno
Desde cu tin Whatsapp Broadcast, Facebook post etc cualke persona por traha algo y mande rond, sin cu mester ta cuadra cu berdad. Esun cu a haci’e, a haci un hopi mal joke cu e hendenan aki y cu nos isla, te hasta aparentemente un persona na un radio cu lo a broadcast e mensahe aki, mas sigur e no lo a confirme prome cu a mande den aire, hungando asina cu sentimento di hende. Awo door di e “MAL JOKE” aki a pone cu e personanan aki a expone nan mes, otro a sali na Television internacional, admitiendo cu nan ta ilegal. Si DIMAS tabata di mala Fe, nan por a manda algun van di Guarda Nos Costa dilanti nan oficina y lo por a bay cu mayoria di nan.
Nunca bay tras di tur loke wordo broadcast of manda riba red social cu no sali di un canal oficial
Pesey mes nunca bay tras di broadcast of cualke mensahe riba red Social cu NO TA SALI DI UN CANAL OFICIAL, paso ken cu ta, cu un mente maligno por traha un broadcast y mande rond. Semper ta bon pa verifica cu un media local y oficial di noticia, si e informacion cu bo a ricibi riba whatsapp, riba Facebook etc. ta oficial. E ta algo hopi tristo y lamentabel loke un persona of mas a haci cu e grupo di personanan aki y sigur lo ta na su lugar pa bin cu un investigacion pa haya sa for di ken y di unda e informacion eroneo aki a sali.
Minister President Evelyn Wever Croes ta haya hopi lamentabel loke a pasa diahuebs mainta y a post esaki riba su facebook den oranan di anochi
“Awe mi a mira dos desaroyo preocupante na Aruba. Dos banda di nos hendenan cu no ta bunita. E prome ta e odio cu ta wordo expresa contra un grupo di persona cu ta bin di otro pais. No ta nos custumber pa expresa nos asina. Ban mustra convivencia cu esnan cu ta pasando den momentonan dificil na Venezuela y ban resa pa nan.
E otro ta e dolor di mira con algun hende ta hunga cu sentimento di otro, door di ganja nan cu awor nan por haya amnistia. Corda cu e grupo di hende aki cu a bin di Venezuela ya caba ta pasando momentonan dificil y no ta husto pa hunga cu nan sentimentonan.
Di nos parti nos ta hasi lo posibel pa yuda, dentro di e posibilidadnan cu nos tin, cu lamentablemente no ta hopi. Nos tin retonan grandi pa enfrenta. Ta solamente uni nos lo vence. Dios spaar nos di hendenan cu ta hunga cu sentimento di otro di e forma aki”.