Home » RUMOR DI AMNISTIA NO TA CORECTO

RUMOR DI AMNISTIA NO TA CORECTO

by Admin
0 comment 93 views

Diahuebs mainta, Gobierno di Aruba a yama un rueda di prensa extraordinario pa atende cu algun tema cu tin di haber cu e situacion na Venezuela. Presente tambe tawata Director di Dimas señora Kathy Paskel y Hoofd di Rampenbureau señor Rino Hermans.

A base di cierto rumornan cu tawata tin den comunidad, a ripara cu tin noticianan cu a wordo difundi cu Gobierno di Aruba, na caminda di e eleccionnan cu ta tuma luga diadomingo awo na Venezuela, lo ta dunando amnistia. Prome Minister Evelyn Wever-Croes a declara cu esaki no ta corecto.

“Nos a tuma nota di hopi rumor cu Gobierno lo ta dunando amnistia na esnan sin status legal na Aruba. Mi ta declara enfaticamente cu esaki NO ta corecto. Regla na Aruba ta cu si bo tin un status legal, bo por keda Aruba. Si bo no tin status legal, bo no por keda Aruba. Esey ta ley y esey ta e maneho di nos Gobierno tambe”.

Prome Minister ta lamenta cu e rumornan aki a conduci cu varios persona pa bay haci un peticion pa asilo politico. E mandatario a splica cu asilo politico ta algo hopi serio y un hende por bin na remarke pa haya asilo politico solamente si su bida ta core peliger si e keda den su pais, un refugiado. Tur otro persona cu ta bin Aruba pa busca un miho futuro y pa biba mas trankil, e mandatario ta enfatisa cu esakinan no ta cay bou di derecho pa haya asilo politico por lo tanto ni mester di pidi asilo politico. Den casonan asina nos ta papia di migrantenan y no di refugiadonan y pues por keda Aruba solamente si tin status legal.

“Den e caso aki, especialmente mirando e situacion na Venezuela, ta bon pa nos haci bon distincion entre asilo politico y migrante”.

E mandatario ta bisa cu algun peticion pa asilo politico a wordo haci y entrega. Di e peticionnan aki NINGUN a ser honra te dia di awe. Nan ta wordo revisa y nan ta wordo trata a base di tratado di refugiado.

“Diaranson y diahuebs mainta tabata tin un avalancha di hende cu a acudi na DIMAS cu a sali di e punto di bista eroneo cu nan por haya un status legal. Mi ta ripiti: e noticia aki NO ta corecto. No tin dunamento di asilo politico of amnistia. E situacion na Venezuela tin nos hopi preocupa, mas aun e consecuencianan pa nos pais. Nos tin e situacion awor bou di control y ta pidi nos comunidad cooperacion. Na e momentonan aki nos mester uni como pais pa enfrenta e retonan dificil aki”, Prome Minister ta termina bisando.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio