Home » Parlamentario Arthur Dowers ta lamenta falta di respet di minister pa Hues

Parlamentario Arthur Dowers ta lamenta falta di respet di minister pa Hues

by Admin
0 comment 54 views

Ta algo hopi serio mes pa scucha un Minister bin dilanti den un conferencia di prensa, lanza acusacionnan serio den direccion di miembronan di directiva di fundacion Lotto pa Depote, sin cu e ta atende e caso aki cu Ministerio Publico.

Parlamentario di fraccion di AVP, sr Arthur Dowers a cuestiona e forma di procede di Minister Dangui Oduber pa e forma con e ta atende cu hendenan serio, hendenan responsabel y ta presta su mes pa lansa acusacion di ladronicia sin cu e ta mustra prueba di esaki.
Ta na su luga, Arthur Dowers a sigui mustra cu si acaso Minister Oduber tin prueba concreto contra miembronan di directiva di e fundacion, pa hiba esakinan Ministerio Publico pa esaki inicia un investigacion pero no insisti pa mishi cu credibilidad y reputacion di hendenan cu a cumpli cu nan responsabilidad den e fundacion.

No mester lubida cu na 2009 a bin haya e fundacion na rand di bancarota pa un maneho iresponsabel hiba pa gobierno di MEP pa ocho aña largo caminda interes di amigonan cerca a wordo sirbi y cantidad di organisacion no a haya e ayudo cu tanto nan tabata anhela for di e fundacion.
E inicia despues un proceso pa renoba y drecha henter e structura di e fundacion pa asina evita cu algo similar lo por pasa cu e fundacion importante aki pa deporte pero aparentemente e minister no ta interesa pa mira e fundacion hiba un maneho responsabel y dirigi riba e interes general di deporte.

A purba di tur forma pa pone man riba maneho di e fundacion y hasta e intento aki a bay para den Corte caminda den forma cla a mustra cu e intencion di gobierno pa cambia directiva di e fundacion, no tin base legal y tin cu respeta e directiva aki.
Parlamentario Dowers a sigui mustra cu despues di e decision di Corte aki a sigui otro maniobranan pa trata di drenta di un forma of otro den maneho di e fundacion caminda Minister a dirigi un serie di pregunta c’un miembro di su partido y parlamentario a dirigi na su persona, pa directiva di e fundacion duna contesta riba esaki.
A pone presion pa logra esaki pero e siman aki Hues un biaha mas a dicidi di impone y decision pa cu e intento di gobierno pa mete den e fundacion y a pone un suma di multa cu por yega den miyones di florin.

Dowers ta lamenta cu na luga cu e minister duna bon ehempel na comunidad y mustra respet pa autoridadnan hudicial, minister ta bay conferencia di prensa y ta bisa na bos halto cu e Hues ta ‘politiekverziek’ un acusacion hopi baho ya cu na ningun momento Hues ta esun cu a mete den politica pero solamente a atende un disputa cu a wordo presenta na su persona pa atende y a tuma un decision relaciona cu esaki.
Ta un mentalidad peligroso sigur ora cu un mandatario ta cuestiona credibilidad di e sistema hudicial, di un Hues mientras cu e institucion aki ta un pilar pa siguridad di nos democracia.
Parlamentario Dowers sinembargo ta mustra cu e tipo di reaccion aki no ta nada straño pa e minister aki, kende nunca a mustra respet pa hende- of institucionnan cu no ta forma parti di henter su propio schema politico.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio