“Mi a priminti y mi ta cumpli. Atraco mester caba aki na Aruba, sea den bon of den malo”, Parlamentario di partido POR, Alan Howell ta expresa enfaticamente.
E ta bisa cu no por ta asina cu nos ciudadanonan ta wordo atraca y maltrata, muy special den nan cas, caminda nan ta ‘suppose’ di ta mas sigur, trankil y na paz. E victimanan aki ta keda mayoria di biaha den un estado di trauma. Pa colmo, polisnan ta haci na trabou, ta gara e malhechornan pa despues huesnan dunanan castigo masha abou mes. Esaki ta algo cu no ta contribui na reduci criminalidad riba nos isla, specialmente e tipo di crimennan di e caliber aki.
Parlamentario Howell ta di opinion cu a traves di e ley di iniciativa pa bin cu castigonan minimo pa atraco, abuso di mucha y abuso sexual lo yuda reduci e crimennan cruel aki. “Castigo minimo di 7 aña pa atraco brutal lo yuda sigur pa trece trankilidad bek. Pedofielnan tambe tin cu wanta duro ya cu lo tin castigo minimo di 5 aña tambe pa nan”.
Dialuna awo 10:30 di mainta, Fraccion di POR lo entrega e Ley di iniciativa di castigo minimo pa e crimennan ariba menciona den mannan di Presidente di Parlamento. Fraccion di POR ta invita tur miembro di prensa pa ta presente na Parlamento. Durante entrega di e Ley di iniciativa parlamentarionan Alan Howell y Marisol Lopez-Tromp lo splica den mas detaye tur loke ta trata e Ley aki.
Partido POR a priminti y partido POR ta cumpli.
“Together we can make it better”.