Home » Comision Condecoracion Real Aruba, “DUNA HONOR NA ESUN(NAN) CU MERECE HONOR “

Comision Condecoracion Real Aruba, “DUNA HONOR NA ESUN(NAN) CU MERECE HONOR “

by Admin
0 comment 52 views

OPORTUNIDAD PA ENTREGA PROPOSICIONNAN PA CONDECORACION REAL 2019

Comision Condecoracion Real Aruba (Comision) ta informa e pueblo di Aruba cu mescos cu den añanan anterior na aña 2019 atrobe, na ocasion di celebracion di Aña di Rey na april 2019, lo tin e posibilidad di haci proposicionnan pa personanan ricibi un Condecoracion Real.

Pa un persona por wordo considera pa haya un condecoracion real mester tene cuenta cu e echo cu e accento ta cay riba prestacionnan particular pa y den comunidad. Tanto riba tereno boluntario, pues trabounan pa cual e persona no a/ta ricibi salario y pa prestacionnan particular cu un persona a haci contra pago, pues den su trabou, si nan ta di un caliber y nivel di e halto ey cu nan tabata di balor excepcional pa desaroyo di Aruba y nan ta surpasa locual normalmente ta wordo spera di su trabou.

Condecoracionnan real ta wordo trata na Hulanda door di e organo cu ta carga e nomber di “Nederlandse Kapittel voor de Civiele Orden”.

Tur persona of instancia cu conoce un persona cu na su opinion ta merecedor di un condecoracion real por entrega un proposicion. E entrega di un proposicion pa un condecoracion real mester wordo haci pa medio di Decoratiecommissie Aruba y mester wordo entrega den un envelop cera na Bureau di Minister Presidente di Aruba (Bureau Minister van Algemene Zaken), na atencion di Decoratiecommissie Aruba, Bestuurskantoor, L.G. Smith Boulevard 76, Oranjestad, Aruba.

Semper un peticion mester wordo manda hopi luna adelanta, casi un aña adelanta, pa por keda cla cu tur tramite na Aruba y na Hulanda. E aña aki e ultimo dia pa entrega un proposicion pa un condecoracion real pa aña 2019 ta diabierna 10 di augustus 2018.

Pa haci e proposicion aki mester haci uzo di DOS FORMULARIO SPECIAL. E formularionan aki ta obtenibel entrante 24 di mei 2018 na balie abou na entrada na Bestuurskantoor na Playa of cerca e miembronan di Decoratiecommissie Aruba. Ademas di esaki e formularionan ta obtenibel tambe via emailadres: [email protected]
E formularionan aki mester wordo yena completo y detayadamente y mester wordo firma door di e persona(nan) of e instancia cu ta haci e proposicion (“voorsteller”).

E motivacion di e peticion ta di crucial importancia.
Pa evalua e meritonan di un persona cu ta wordo proponi pa un condecoracion real ta di sumo importancia pa duna tur informacion pidi riba e formularionan y pa menciona tur dato y informacion cu por duna realse na e trabou(nan)/actividad(nan) desplega door di e persona en cuestion. Comision Condecoracion Real Aruba ta haci un apelacion pa sea asina bon di pone hopi atencion na esaki.

Por fabor tuma nota cu proposicionnan incompleto of cu a drenta laat lamentabelmente no por wordo trata. E “Nederlandse Kapittel voor de Civiele Orden” ta trata solamente e proposicionnan completo y cu a drenta na tempo.

“Nederlandse Kapittel voor de Civiele Orden” cu ta e organo cu ta duna e conseho definitivo pa cu e condecoraconnan real, ta hopi estricto. Por ehempel den caso cu un persona tin tremendo logronan pa comunidad, pero e tin por ehempel boetnan, un persona asina lamentabelmente, no ta bin na remarca pa un condecoracion real durante cierto periodo. Por ehempel pa un boet durante un aña y dependiendo di e cantidad di boet durante mas aña.

Ta deseo di Comision pa mira hopi persona den nos comunidad ricibi un condecoracion real na 2019, ta p’esey un peticion na un y tur, pa haci un esfuerso pa esaki bira realidad y nos por honra nos hendenan balioso. Comision Condecoracion Real Aruba ta spera cu pa Aña di Rey 2019 tambe comunidad lo reacciona cu hopi entusiasmo pa reconoce esnan cu ta haci trabou importante pa y den nos comunidad.

Den caso cu tin cualkier pregunta of pa mas informacion por tuma contacto cu e siguiente miembronan di Comision Condecoracion Real Aruba: sra. F. Perez-Lopez, tel 5838425, sra. F. Croes-Rodriguez tel 5821790, sra. N. Anthony cel 5931921 y sr. V. Frank, tel 5874979 y cel 7407071, of via email: [email protected].

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio