Home » ATCA 2018: UN CONFERENCIA CU TA MUSTRA E IMPORTANCIA DI NORTE AMERICA PA ARUBA SU TURISMO

ATCA 2018: UN CONFERENCIA CU TA MUSTRA E IMPORTANCIA DI NORTE AMERICA PA ARUBA SU TURISMO

by Admin
0 comment 48 views

Oranjestad: E siman aki, nos destinacion un biaha mas ta anfitrion di un conferencia turistico internacional, e biaha aki ta trata di e di 34 edicion di ATCA 2018 – Annual Tourism Conference Aruba.

Diamars anochi, participantenan como tambe socionan a wordo ricibi cu un caluroso bonbini na Hilton Aruba. Durante e anochi ameno e invitadonan por a disfruta di un dinner den e ballroom cu decoracion estilo añanan 50/60, cual tema a wordo scogi di e temporada cu e edificio di Hilton a wordo construi y inaugura (aña 1959 bao nomber di Aruba Caribbean Hotel). Por a nota cu e decoracion tawata algo unico cu hasta autonan clasico di e temporada ey a wordo uza den e ballroom, algo cu a cay masha na gusto di e participantenan/invitadonan.

Diaranson mainta e apertura oficial a tuma luga na Renaissance Convention Center, unda Minister President Sra. Evelyna Wever-Croes a habri e conferencia, expresando su gratitud na tur e participantenan cu ta haciendo Aruba nan prioridad pa bende den exterior y asina atrae e bishitantenan pa disfruta di nos bunita destinacion. Ademas el a pone enfasis riba hecho cu nos hendenan local ta un di e caracteristicanan mas importante cu nos isla ta dispone di dje.

Na ambos e anochi y mainta di apertura un gran cantidad di miembro di parlamento tambe a haci acto di presencia asina dunando realse na e pilar di nos economia. Presidente di Parlamento di Aruba Sr. Ady Thijsen, Vice Presidente Sr. Alan Howell, miembronan di Comision di Turismo di Parlamento, incluyendo Sra. Setty Christiaans-Yarzagaray cu ta encabesa e comision tabata presente. Tambe ta gradici Minister di Transporte, Comunicacion y Sector Primario Sr. Chris Romero pa su presencia.

Diaranson mainta, Minister di Turismo Sr. Danguillaume Oduber a elabora riba e importancia di e industria di Turismo pa Aruba, elaborando cu Aruba ta un isla hopi diversifica cu orientacion internacional, pero uno cu ta trata di mantene y accentua mas su cultura propio, loke nos bishitantenan ta encanta. Tambe a subraya e hecho cu e mercadonan Mericano y Canades ambos ta sumamente importante pa pais Aruba y cu por a nota cu e mercado primario, esta Merca, a mustra un crecemento anual di 4% desde 2011.

CEO di Aruba Tourism Authority, Sra. Ronella Tjin Asjoe-Croes a ilustra e importancia di Norte America pa Aruba su turismo. A pasa den resultadonan clave incluyendo hecho cu Merca a crece cu 11% na 2017 y te cu april 2018 cu 7%. Pa cu Canada a indica cu esaki a cera 2017 cu un crecemento di 12% y te cu april 2018 ta sigui crece, cu 11%.

A subraya pa medio di presentacionnan con imperativo ta pa semper tuma e dinamismo di turismo na cuenta y sigui tendencianan global, cual CEO di A.T.A. a comparti.

Despues di esaki, CMO di AHATA Sr. Jim Hepple a comparti desaroyonan clave den e sector hotelero y otronan, cu esnan presente. Mientras cu Sr. Fazio a pasa den e proyecto di aeropuerto ‘Beatrix 2030’.

Sr. Gregg Wasiak di The Concept Farm, agencia di advertising pa Aruba, a elabora riba un campaña nobo pa Aruba. E campaña ta pone e hende di Aruba central y ta conta locual Aruba ta significa y ofrece pa medio di e personahenan aki den nos comunidad.

Aruba Tourism Authority ta gradici tur participante pa nan aporte continuo. E participacion na ATCA 2018 ta indica caba cu e interes den nos destinacion ta uno continuo, pero uno cu ta exigi trabou y dedicacion pa di es manera ey mantene e interes na e nivel aki.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio