Minister President, Sra. Evelyn Wever-Croes ta anuncia e proyecto AREA, Aruba Re-Imagined Areas, pa desaroya nos centronan di ciudad. Como parti di e plan nacional di innovacion, AREA, lo ta un iniciativa pa explora areanan unda tin oportunidad pa innova na Aruba y na mes momento trece actividad economico den nos cuidad nan comercial, manera Oranjestad y San Nicolas.
Gobierno su vision pa Aruba ta pa crea un isla lider den innovacion y conoci rond mundo, pa su desaroyo duradero. Trahando hunto, innovacion lo mehora productividad y lo ta e motor tras di desaroyo socio-economico y duradero. Ademas pa medio di e iniciativa aki nos lo inverti den e potencial di nos hendenan y catalisa innovacion den nos districtonan y trece bida bek den nos cuidadnan principal.
Pa soluciona e reto nan local y crea un districto sostenibel, e aspecto mas crucial ta e infrastructura digital pa encurasha creatividad y colaboracion entre habitantenan. P’esey, e proyecto AREA lo colabora cu diferente instancianan den sector publico como sector priva pa crea un ambiente pa yuda encurasha desoroyo social, innovacion, creatividad, cu lo trece crecemento economico.
E proyecto AREA lo incorpora elementonan di ‘Smart Cities’, cu e meta pa crea un area energetico, pa haci compras, recrea, y pa comercio en general. E concepto di ‘Smart Cites’ lo inclui aspectonan di sostenibilidad, accesibilidad, coleccion di informacion, un infrastuctura digital, interconectividad di aparatonan via internet pa colecta informacion esencial (‘internet of things’, por ehempel sensors pa midi trafico, sonido of aparato pa midi calidad di aire). Ademas di esaki, lo crea un mapa digital di e districto, lugarnan pa encuentronan creativo, viviendanan economico pa hobennan profesional, actividadnan pa comunidad, pa nos grandi y chikitonan, jardinnan publico, agricultura urbano y esaki ta solamente e comienso.
E prome fase di AREA lo enfoca riba e districtonan di Oranjestad y San Nicolas. Lo crea un plan di desaroyo pa e proyecto hunto cu tur stakeholders y tambe comunidad por medio di un proceso participatorio.
Den cuadro di esaki nos ta invita un y tur pa tuma parti den nos encuentro den e districto di Oranjestad dia 22 di mei 2018 di 6:30 pa 9or di anochi na Cosecha Oranjestad. Nos segundo encuentro lo tuma lugar den e districto di San Nicolas dia 23 di mei 2018 di 6:30 pa 9or di anochi na Cosecha San Nicolas.
Colaboracion cu e comunidad di Oranjestad y San Nicolas ta importante pa crea un plan unico y innovativo pa enrikece e actividad economico den e districtonan aki. Pa mas informacion por tuma contacto cu Gabinete Wever-Croes via nos pagina Facebook.