ORANJESTAD – Educa bo yiu(nan) tocante desaroyo sexual ta un tarea di mayor(nan)/educador(nan). Ta wordo recomenda pa cuminsa haci esaki for di ora cu e mucha ta chikito pero teniendo na cuenta e madurez emocional y intelectual di e mucha, pa asina evita adelanta contenido cu nan lo por compronde miho mas despues.
Departamento Asunto Social (DAS) a organisa den luna di april un charla titula ‘comunicacion positivo tocante desaroyo sexual’. E charla a wordo presenta pa Corina Linssen y Noëmi Haddocks di Tienda di Educacion y a enfoca riba e diferente fasenan cu un mucha ta pasa aden durante su crecemento. E curso aki tabata completamente gratis y a wordo presenta prome pa e clientenan di DAS y despues pa resto di e comunidad.
E meta principal tras di e charla aki tabata pa educa mayor(nan)/educador(nan) riba e importancia pa tin conocemento riba e tereno di desaroyo sexual y con pa aplica esaki den un manera positivo den nan hogar. Si mayor(nan)/educador(nan) tin e conocemento di e fasenan aki, esey lo por yuda cu e manera con ta cria/educa poniendo enfasis riba e necesidadnan di e muchanan. Na final di e tayer e mayor(nan/educador(nan) tabata tin un conocemento y e hermentnan cu nan mester pa por uza na un manera positivo pa asina por comunica cu e mucha(nan) tocante nan desaroyo sexual.
Mayornan na Aruba ta haya nan cu hopi reto ora ta trata educacion di nan yiu(nan). Hopi di e mayornan aki ta yega DAS pidiendo guia pa nan mes y/of pa nan yiu(nan).
Ademas di ofrece mayornan y famia e guia individual, DAS ta ofrece charla/tayer nan informativo y educativo relata na e diferente peticionnan cu e cliente nan di DAS ta bini cu ne. DAS lo sigui organisa diferente charla y tayer educativo pa asina sigui sostene e mayornan na Aruba.