Home » Prome Minister Evelyn Wever-Croes: BESLAGNAN PONI RIBA CARGAMENTO DI CRUDO LO NO AFECTA ARUBA

Prome Minister Evelyn Wever-Croes: BESLAGNAN PONI RIBA CARGAMENTO DI CRUDO LO NO AFECTA ARUBA

by Admin
0 comment 52 views

Tocante e beslagnan cu ConocoPhillips a cuminsa pone riba pertenencianan di PDVSA, Prome Minister Evelyn Wever-Croes ta indica cu esakinan lo no afecta Aruba. Sinembargo Prome Minister ta bisa esakinan ta e di prome casonan pero ta pensa cu lo tin mas casonan asina cu lo bini. ConocoPhillips lo purba di tur manera pa yega na e cen cu e ta pensa cu e tin derecho riba dje y ta pensa cu PDVSA debe.

Prome Minister a duna di conoce cu Aruba a scapa di e prome beslag di ConocoPhillips. Aki hues a bisa cu nan no tin derecho pa pone e beslag, sinembargo manera anticipa, a bin mas beslag. Ayera ConocoPhillips a purba pone dos otro beslag riba barconan cu tawata treciendo crudo pa Aruba. E crudo aki tawata pertenece na PDVSA y a wordo cumpra door di Citgo.

Citgo, siguiendo e procedura normal di beslag, como doño a bay corte. Citgo den e caso aki ta reclama cu e crudo ta pertenece na dje y no na PDVSA. Segun Citgo, nan tin un sistema den nan contract cu nan ta yama FOB (Free On Board). Esaki kiermeen cu na e momento cu e crudo pasa for di e tankinan di PDVSA y bay riba e barco di Citgo, e derecho di propiedad automaticamente ta bira di Citgo.

Prome Minister sinembargo ta considera esakinan detayenan tecnico entre Citgo y ConocoPhillips y ta sigura cu esaki no a afecta Aruba den niun sentido pasobra no ta e gasolin cu Aruba mester di dje a wordo embarga sino e crudo cu no a bay den e tankinan di deposito. Esakinan ta e tankinan cu Aruba ta huur cu PDVSA of otro cu no tin caminda pa warda nan crudo, nan por haci esaki den e tankinan aki.

E mandatario un biaha mas ta enfatisa cu e caso aki no ta afecta Aruba. Aruba lo por spera mas di e casonan aki den corte pa motibo cu e situacion di PDVSA mes ta esun cu ta induci esakinan. Pa cua motibo tambe, Prome Minister no ta haya necesario pa Gobierno sali duna declaracion cada bes cu tin un beslag y caso den corte.

“Pero na e momento cu esaki afecta Aruba, Gobierno di Aruba lo reacciona mesora pa informa comunidad con e embargo ta afecta Aruba y cua ta e pasonan cu lo wordo tuma pa Gobierno di Aruba”, Prome Minister Wever-Croes a enfatisa.

E mandatario ta finalisa ta bisa cu den fin di siman el a pidi RdA y Hunta di Comisarionan di RdA cu a wordo apunta pa traha un plan di contingencia pa garantisa cu Aruba no ta cay den e riesgo aki.

“Aruba a scapa esun di prome, y e dosnan ultimo. Sinembargo por yega un dia cu algo bay diferente y haci cu nos no lo scapa di dje. Esaki ta un riesgo cu nos no kier core. Si un biaha gasolin no por drenta Aruba, y nos autonan keda sin gasoline, esaki lo ta un calamidad. Y esaki ta loke nos ta evita. Nos tin un plan traha cu basicamente ta contene cu tur e gasolin cu nos ta bay cumpra pa uzo aki y fuel pa avionnan lo no wordo cumpra for di ningun compania cu por cay bou di e riesgo aki. Tin algun contractnan cera caba na cualnan nos ta mara. Pa evita cualkier riesgo, nos lo no deal cu e companianan aki por lo pronto”.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio