Home Politics Parlamentario Endy Croes : Pueblo no por paga pa Candelaria goza!

Parlamentario Endy Croes : Pueblo no por paga pa Candelaria goza!

Lo exigi pa Mike Eman of Robert Candelaria paga bek pa nan abuso cu placa di pueblo

Parlamentario Endy Croes ta splica cu documentonan a yega. Desde algun siman pasa por a tuma nota di informacionnan circulando cu Robert Candelaria, parlamentario di AVP a wordo privilegia cu placa di pueblo. Kico exactamente ta e caso? Parlamentario Croes ta sigui splica cu tin tur evidencia con esaki a tuma lugar. E caso aki tin di haber cu e manera cu Candelaria a wordo trata unda gastonan tabata wordo carga riba Pais Aruba pa cosnan personal y cosnan di partido AVP.

Biahenan riba custia di pueblo
Durante aña di eleccion AVP tabata tin bastante problema pa haya candidato pa subi nan lista. Tur esaki debi na tantisimo corupcionnan cu tabata tin andando. Nos por corda e caso di Paul Croes pero tambe casonan di corupcion cu tereno entre otro entre Benny y Leoncita. Caso di Hedging di Mike De Meza y asina por sigui menciona mas. No tabata facil pa AVP haya candidato di peso y a cuminsa busca na un forma desespera hendenan den farandula cu cero (0) experencia pero tambe hendenan biba den exterior cu kisas no ta ful altante di e corupcionnan di AVP. Asina a acerca Robert Candelaria na Corsou kende tin un track record como un fanatico fiel di AVP tempo e tabata traha na Aruba. Locual ta remarcabel ta cu sr. Candelaria a biaha na 4 ocasion den luna di Juni y Juli 2017 for di Corsou pa Aruba y Ministerraad di Aruba a tuma decision tur 4 biaha cu Aruba lo paga su gastonan como “dienstreis” bao di e titulo werkbespreking, mientras sr. Candelaria no ta den servicio di Land Aruba y tabata biba y trahando na Corsou.

Fraude y corupcion
Tur e werkbesprekingnan aki a tuma lugar den Cas di partido AVP. Pues Land Aruba tabata paga pa Candelaria bin negocia su posicion pa subi lista di AVP. Wak con leu Mike Eman a bay pa carga pais Aruba cu e gastonan aki bou pretexto di dienstreis y werkbespreking! Esaki ta e lider cu a destrui nos pais creando e Mega Debe y un “Desaster” nunca visto. Awor e pregunta cardinal ta lo siguiente: Candelaria ta di confia? Como ex-polis cu a lidera hopi investigacion sr. Candelaria mester por a bisa Mike Eman cu bo ta cometiendo fraude of sea un cabayero y bisa AVP cu si boso no ta pag’e mi mes lo pag’e pero no por haci corupcion cu placa di pueblo na e manera aki. Parlamentario Croes ta en busca di documentonan di Hotel cu a wordo paga pa Candelaria cada biaha cu el a bin Aruba pa negocia su number. Adhunto lo manda 2 prueba di e 4 biahenan cu Pais Aruba a paga pa Candelaria. Pa tur claridad nos tin tur 4 decision di Ministerraad.

Debolbe placa di pais Aruba
Mas remarcabel tambe ta e ministerraad vergadering di 7 di Juli 2017 unda ta aproba un werkbespreking pa 4 di Juli 2017, esta un werkbespreking cu a pasa caba y ta wordo firma cu stempel fecha 19 di Juli 2017 (mira e documento). Mi pregunta na Candelaria como un ex-Polis y Recherche: Kico ta bo opinion di e documento aki momento bo wak algo asina? Bo ta haya esaki algo normal unda bo nomber ta aparece riba algo cu bo sa bon bon cu bo no ta den servicio ainda di gobierno y ta biaha riba custia di pueblo como dienstreis? Mi lo duna Candelaria e beneficio di duda pa e contestami pero mi lo anticip’e cu mi lo haci e mesun pregunta aki den un proximo reunion publico. Usando e derecho di un Parlamentario di acuerdo cu Reglement van Orde # 59 y Staatsregeling III mi lo manda un carta pa Minister di Finansas pa busca tur “invoices”, documentonan alrespecto e 4 biahenan aki tanto pasashi, auto di huur y hotel y e suma total. Sea Candelaria lo mester paga Land Aruba bek of Mike Eman lo bay core cu e gastonan aki. Nos a campaña cu lo pone cada ken responsabel pa nan actonan coruptivo y descabeya y esaki ta un di e tantisimo abusonan cu placa di pueblo cu ta saliendo na cla y lo mester wordo rechtgetrokken.