Gabinete Wever lo percura pa periodonan financiero fastioso
ORANJESTAD, Aruba: Den e di dos parti di aña pueblo di Aruba lo spera hopi cambio, di cual lo conta cu varios medida, sea bieu of nobo cu e coalicion MEP-POR-RED lo introduci. Tin biaha ta tende informacionnan cu ta bay y bin, pero ta importante pa haci un inventarisacion y pone nan hunto pa por clarifica. Fraccion di AVP sa di medidanan di e Gobierno actual cu lo drenta na vigor den e di dos mita di aña di cual algun tin fecha fiho caba y otronan ainda no.
Parlamentario di Fraccion AVP, Robert Candelaria, ta corda cu tempo MEP tabata den oposicion, tabata indica cu Serlimar ta cos cu no mester bay paga y pa no haci esaki. Pero den e di dos mita di aña aki nan lo cuminsa cobra pa recoge sushi na cas y cu nan lo haci esaki cu forsa retroactivo pa tur hende cu no tabata pagando Serlimar prome. Esaki ta algo cu mester tene cuenta cun’e, pasobra si Gobierno no cambia su intencion e lo bira un gasto adicional significativo.
Gabinete Wever-Croes tambe tin intencion di reintroduci AruParking, cobrando henter dia pa parkeer den centro di ciudad y uzando klem y takel auto di chauffeurnan cu no cumpli. “Si esey bini, atrobe e lo afecta e centro di Playa”, asina Parlamentario Candelario a duna di conoce. Hende por ta di acuerdo of contra, pero esey ta loke cu Gobierno kier bin bek cun’e.
Un otro medida di e coalicion aki ta e aumento di BBO/BAZV cuminsando na luna di Juli. E aumento aki lo ta di 2.5%, pero tur hende mester corda cu tin diferente “schakel”. Esey ta nifica cu e importador cu ta bin cu un producto, ta cobra BBO y pas’e pa un rebendedo, esey ta 2 pa 3 schakel pa cada producto. Y keda conta esey hunto cu companianan cu ta duna servicio tambe lo tin cu paga e aumento di impuesto aki y asina aki lo a yegando alrededor di un aumento di prijs di 9% pa 10%. Esaki lo ta un inflacion hopi grandi y esaki ta start na luna di Juli proximo.
Ta en espera di mas cos, unda cu Parlamentario Richard Arends ta papiando riba accijns di gasolin. Pa fin di aña esaki lo tin cu yega 10 cen y esaki ta sin e aumento di BBO/BAZV cu ta bin riba e tarifa di combustibel. E ta algo fastioso pero ta importante pa pueblo sa kico mester spera di e Gobierno aki. Companianan cu ta haci uzo di gasolin pa transporta nan producto, lo cobra e cumprado esaki pasobra nan mes no lo bay carg’e. Y asina aki e prijsnan lo keda subi!
Den e maneho di Hedging cu WEB Aruba NV ta uza ora cumpra Heavy Fuel Oil for di companianan di exterior tambe a introduci cambio. Pa rason politico a laga para Hedging y awor ta sinta cu e realidad cu prijs internacional ta subiendo drasticamente y cu esey lo afecta e prijs di awa y coriente den e siguiente lunanan. Fraccion di AVP sa cu e prijs di crudo actual ta na 78 dollar pa bari. Tempo cu nos tabata “hedge” e prijs tabata rond di 60 dollar pa bari. Ta spera cu prijs di petroleo lo sigui subi. Esaki ta algo cu pueblo lo mester tene cuenta kico ta biniendo.
Den e di dos mita di aña bay ariba, nos lo bay tin periodonan financiero hopi fastioso bou di e maneho actual. Fraccion di AVP ta lamenta esaki, pasobra e Gobierno nobo encabesa pa Evelyn Wever-Croes a priminti den campaña cu lo elimina parkeermeters, lo no cobra pa piki sushi, lo baha BBO, lo baha prijs di awa y coriente, pero e realidad ta mustra awor cu tur loke nan a bisa awor ta haciendo net lo contrario. Awor por mira structuralmente con ta asota pueblo cu medida den forma acumulativo, afectando e poder di compra di nos pueblo drasticamente.