Home » Parlamentario Alan Howell Posibilidad pa entrega 300 tereno lo pone cu nos economia por draai positivamente

Parlamentario Alan Howell Posibilidad pa entrega 300 tereno lo pone cu nos economia por draai positivamente

by Admin
0 comment 57 views

Parlamentario di POR, Alan Howell a indica cu e ta contento di por a mira mas o menos 300 persona cu a reuni riba invitacion di Minister Otmar Oduber y Gabinete Wever-Croes pa atende nan peticion pa tereno cu nan a haci hopi aña atras.

Howell ta bisa cu hopi biaha ta keda para riba solamente tereno y trahamento di cas, pero e aspecto cu e trancamento cu tabatin pa varios aña den e gabinete anterior no ta solamente fastioso pa esnan cu no a haya tereno. E tin di haber tambe cu economia.
Construccion ta un estimulo grandi pa economia, si tin casnan den construccion lo tin mas tata y mama cu oportunidad di haya trabou y pone pan riba mesa. Si tin construccionnan tumando lugar, banconan tambe ta draai, ta bay tin prestamonan y asina consecutivamente e diferente areanan di nos economia ta draai positivamente.

Pesey Parlamentario di POR, Alan Howell ta bisa cu loke a tuma lugar dialuna den Conference Center no ta algo grandi solamente pa esnan cu a haya tereno, pero pa Aruba en general. “Na momento cu nos ta papia cu 300 persona ta yegando na remarke pa haya tereno, nos por compronde cu lo tin 300 cas den construccion. Esaki ta encera tambe cu tanto hende homber como hende muher lo tin oportunidad di haya trabou. Na un manera of otro, Aruba lo por saca probecho di loke a pasa dialuna”.

El a manda pabien na tur e personanan cu a wordo invita pa ta presente durante e ceremonia pa haya tereno y a desea cada un di nan exito den e planificacion pa nan por yega na nan cas.
Cu e paso aki ta bayendo den un direccion di un mihor forma di biba y un mihor forma pa atende cu e ser humano. Algo cu ta cuadra cu e maneho di actual Gabinete Wever-Croes cu tin e ser humano central.

Adicionalmente Howell a bisa cu e ta contento di por a mira cu Minister Otmar Oduber a ‘walk su talk’ unda den un periodo di 6 luna, partido POR a cumpli cu su promesa di campaña di duna nos hendenan un mihor bida, di tin nos hendenan central. Den e tempo aki el a reorganisa DIP y a logra yama e 300 personanan cu pa añanan largo tabata wardando riba tereno, pa acudi pasobra nan a bin na remarke pa haya loke algun di nan a pidi hopi tempo pasa.

Tambe el a bisa cu e ta contento di mira cu e Gobierno actual a concentra riba e homber y muhernan chikito y no manera e gobierno anterior cu a concentra riba esnan cu tin placa y esnan cu kier traha hotel of condominio.
Pa e motibo ey el a felicita gobierno y bisanan na mes momento cu Fraccion di POR tin wowo skerpi riba nan, cu si tin algo pa reclama, lo hacie y si tin cosnan pa felicitanan lo hacie tambe, manera ta e caso aki.

Finalisando Alan Howell a bisa cu Fraccion di POR lo ta pendiente pa mira na ki momento e siguiente grupo cu lo bin na remarke pa haya tereno lo wordo yama pa asina e personanan cu por yega na nan propio cas bira mas grandi na beneficio di nan mes y di Aruba en general. Masha pabien na Minister Otmar Oduber y Gabinete Wever-Croes.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio