Home » A.T.A. SATISFECHO CU ENCUENTRO EXITOSO CU OPERADORNAN TURISTICO DI LATINOAMERICA

A.T.A. SATISFECHO CU ENCUENTRO EXITOSO CU OPERADORNAN TURISTICO DI LATINOAMERICA

by Admin
0 comment 55 views

ORANJESTAD—Siman pasa Aruba Tourism Authority (A.T.A.) tabata anfitrion di un grupo di operador di biahe for di Latino America den cuadro di e conferencia LAPMA 2018. E tipo di encuentronan aki ta forma parti di A.T.A. su vision y plan di maneho pa sigui diversifica nos mercado y accentua e autenticidad di nos producto Aruba. Participantenan a keda masha impresiona cu e avancenan cu Aruba a conoce na nivel di infrastructura y mercadeo, y tambe ta entusiasma pa loke tin planea den futuro, riba termino corto, mediano y largo.

Pa realisacion di e programa cu a inclui bishita na hotelnan, presentacionnan informativo y tambe sesionnan ‘Business 2 Business’, A.T.A. a conta cu cooperacion di varios socio den e sector turistico. Operadornan di Latino America por a experiencia un poco di nos cultura, arte y historia Arubiano y asina tin un variedad di opcion pa mercadea nos isla como destinacion di reunion cu nan clientenan potencial.
A disfruta di cena na Divi, actividadnan riba De Palm Island, paseo riba barco Montforte y cena na restaurant Wilhelmina na Oranjestad; y tur esey tabata riba e prome dos dianan di e conferencia. Pa diamars tur hende a reuni na ballroom di Hyatt Regency caminda a tene diferente workshop. Aki CEO di A.T.A., Ronella Tjin Asjoe-Croes a yama nan bonbini oficialmente y a duna presentacion riba e resultadonan recien di nos turismo y kico ta e plannan riba mesa.

Fuera di indica cu e obhetivo pa 2018 ta pa aumenta e bishitanan for di Latino Americano -excluyendo Venezuela- cu 17.3%, Tjin Asjoe-Croes a expresa cu: “Nos ta totalmente comprometi cu e mercado di Latino America, nos ta sigur cu, cu e direccion menciona, strategia, enfoke y hunto cu boso apoyo, nos ta bay logra un 2018 y 2019 exitoso.”
Alejandro Rico di Google a continua cu e agenda di e dia haciendo su presentacion, sigui pa Juan Camilo Romero y Juan Pablo García, ambos di MullenLowe SSP3. Nan a duna workshop parti atardi cu espacio pa pregunta y contesta. E participantenan a clausura e dia cu un cena na Fish House.

Riba e di cuater dia di conferencia, participantenan tabatin oportunidad di sinta na mesa individualmente cu representantenan di companianan local. Ta trata aki di hotel, restaurant, compania di tours, organisado di evento, etc. etc. E programa a culmina cu un lunch na Marriott Resort & Stellaris Casino caminda e encuentronan comercial a tuma luga tambe.

Un momento special y conmovedor tabata e homenahe postumo na Sr. Alvaro Velez de la Rosa. Representante di A.T.A. na Colombia, Maria Victoria Galan a hiba palabra compartiendo cu coleganan di e industria cu “…pa hopi aña Sr. Velez de la Rosa tabata lider den e promocion y venta di Aruba den e mercado Colombiano. Riba e dia aki, nos ta spera di resalta su balornan, pa nos e ta keda semper un persona involvidabel.” Ademas Sra. Galan a añadi na su speech: “Por bisa cu e turismo Colombiano tin un ‘prome’ y un ‘despues’ di Alvaro Velez. E tabata e pionero di operacionnan charter na Colombia. Na comienso di añanan 80 el a inicia un carera briyante pa consolida e negoshi di operacionnan charter pa Caribe y Suramerica.”

Turismo procedente for di e continente Latino America a trece te cu april 2018, 43.554 bishitante pa nos destinacion, cu ta 12% di e total di turismo pa Aruba (marketshare). Atrabes di encuentronan manera LAPMA y ATCA cu lo tuma luga consecuentemente, A.T.A. ta percura cu ta mantene un relacion estrecho y fructifero cu e socionan di sector turistico na Latino America. Oficina di Turismo ta gradici tur esnan cu a forma parti di e exito cu tabata LAPMA 2018 y ta spera di por sigui traha hunto na bienestar di turismo di nos pais.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio