Cu e tema: utilisacion positivo di Inteligencia Artificial pa tur
ORANJESTAD – Dia 17 di mei ta Dia Mundial di Telecomunicacion y di Sociedad di Informacion. For di aña 1969 Union Internacional di Telecomunicacion (ITU) ta celebra riba e dia aki “Dia Mundial di Telecomunicacion”. Na maart 2006 a añadi e parti di “Sociedad di Informacion”. E ta encera un sociedad global den cual un y tur (incluyendo pobernan) tin acceso na informacion via Tecnologia di Comunicacion y Informacion (ICT).
Tur aña ITU ta scoge un tema pa e dia di 17 di mei. Esun pa e aña aki ta: Permiti utilisacion positivo di Inteligencia Artificial pa un y tur. E atencion lo ta riba e potencial di Inteligencia Artificial pa acelera e obhetivonan pa un desaroyo sostenibel di Nacionnan Uni.
Tin diferente definicion di Inteligencia Artificial (IA). Un di nan ta cu IA ta aparatonan cu ta reacciona riba data of impulso den nan vecindario y a base di esakinan por tuma decision riba nan mes. Pues e no ta bay pa e habilidad pa haci calculacion pero e posibilidad pa observa, siña y tuma decision independiente. Door di siña di nan propio erornan, nan ta produci cada bes un miho resultado. Akinan nos ta papia di adkisicion automatico di conocemento (Machine Learning).
IA ta pues e intelegencia di machin, software y aparato pa resolve problemanan independiente imitando asina e capacidad di pensa di hende.
Ehempel ta robot cu por lesa señalnan social, manera expresion di cara y entonacion y vehiculonan sin conductor.
Den e ultimo añanan tabatin progreso significante den e tecnologia di IA, danki na e avancenan grandi den areanan contribuyente manera entre otro data grandi (Big Data), adkisicion automatico di conocemento, poder di calcula, capacidad di warda informacion y computarisacion den nubia (“cloud computing”).
Tecnologia basa riba IA ya caba ta aparece como un componente clave di instrumento- y aplicacionnan cu ta ser utilisa pa yuda humanidad hiba un bida miho door di mehora cuido di salud, educacion, financia, agricultura, transportacion y un area grandi di otro servicionan.
E tema di 2018 lo permiti paisnan miembro di ITU y otro partidonan interesa clave pa focus riba e oportunidadnan pa cual IA por yuda acelera e logro di e obhetivonan pa un desaroyo sostenibel pa 2030.