Parlamentario Setty Christiaans-Yarzagaray a duna un splicacion amplio di e forma con ta calcula e prijs di Gasolin na Aruba y dicon prijs ta subi. Subida di prijs di gasolin den e ultimo dianan como tambe den e luna anterior a crea un comosion den nos comunidad. Mirando e hecho cu e prijs di gasolin a subi ta bon pa informa pueblo con en principio e prijs di gasolin ta wordo calcula. E Parlamentario ta sigura cu esaki no ta bin door di e signatura di un gobierno sea ta geel, blauw y blanco of berde.
Christiaans-Yarzagaray ta indica cu pa tempo caba e ta sigui e forma di calcula e prijs di gasolin na Aruba y pa hopi aña y su calculacion a keda mescos. Departamento di Asuntonan Economico ta esun cu ta calcula esaki y tin su metodologia pa calcula e prijs cu ta basa riba e prijs di crudo di e luna anterior. Contrario na Corsou cu ta tuma 2 luna, Aruba ta tuma un promedio di 1 luna so.
E Parlmentario ta ilustra por medio di grafiek cu datonan desde 2006 (y tin dato di prome cu 2006 tambe) unda por wak e tendencia den pasado cu ta mustra cu prijs di gasolin semper ta wordo relata na e prijs di crudo. Grafiek 1. Desde 2006 y te hasta prome cu esaki, e tendencia of comportacion di prijs di gasolin na Aruba ta exactamente e tendencia di e prijs di crudo internacionalmente. E Parlamentario a enfatisa cu esaki no ta algo nobo ni desconoci na Aruba pa e Gobierno actual ni pa e Gobierno anterior. E ta un calculacion cu Gobierno conhunto cu e departamento a stipula y si ta desea cambio, esaki lo por wordo haci tambe den consulta cu departamento concerni.
Christiaans-Yarzagaray a indica cu na 2008, manera indica den Grafiek 1, tawata tin e prijs di crudo mas halto registra na unda cu e Minister di Finanzas e tempo ey a dicidi di absorbe parti di e efecto pasobra e prijs di gasolin lo a bira asina halto pa e pueblo. A absorbe mas o menos cu 10 cen pa asina mitiga e efecto, teniendo cuenta cu esaki lo tin efecto inflatorio tambe pa e comunidad. Di e tempo ey pa awo, por bisa cu e prijs di crudo a baha y naturmente e prijs di gasolin tambe a baha.
Parlamentario Christiaans-Yarzagaray ta haya straño cu un ex-Minister y actual Parlamentario di AVP ta mal informa pueblo bisando cu awo ta e prome biaha ta experencia esaki siendo cu na 2008 claramente ta indica cu a yega e prijs di 2.60 y esaki tambe tawata basa riba e prijs di crudo mescos cu awo. Kiermeen e tempo ey, e prijs di crudo internacional tawata asina halto cu e prijs di gasolin a yega 2.66 pa liter na Aruba. Es mas, prijs di gasolin desde 2011 te cu 2014 tawata constant riba 2 florin pa liter.
E Parlamentario a duna di conoce cu Banco Central tambe, den su rapport ‘Economic Outlook 2018’ ta indica na pagina 7 cu ta premira cu prijsnan di crudo internacionalmente ta subiendo y cu esaki lo tin efecto riba e crecemento di prijs di gasolin na Aruba. Tambe e Parlamentrio ta bisa cu esaki tin di haber cu direpente Venezuela su inventario riba mercado ta wordo poni bou presion. Ta mescos cu aña 2008 cu tawata tin e subidanan drastico di fuel, Merca tambe a dicidi di bora petrolio pa asina e no tin mester di depende riba e paisnan den oeste. Esaki a causa tambe cu e prijs di crudo a baha bek. Awor cu e petroleo di Venezuela no ta mesun acesibel mas, ta haci cu atrobe cu mercado ta subi prijs di crudo.
Por bisa si cu e bon noticia ta, mirando cu Aruba ta calcula su prijs di fuel basa riba ‘West Texas Intermediate Crude Oil Prices’ (WTI), cu e pronostico actual di WTI ta cu no ta premira cu e prijs lo bay fluctua of yega e nivel manera na 2008 of na 2013 mes. Na aña 2013 prijs di crudo a yega US$106.60 pa bari y na 2008 esaki a yega casi US$ 136 pa bari. Esaki ta wordo ilustra tambe riba e grafiek.
Na aña 2016 e prijs di crudo a baha te na US$30.19. Tawata momentonan cu AVP a hedge prijs di coriente na Aruba hasta, cu tambe ta mara na prijs di crudo, na unda a kita ful e espacio pa pueblo por a spaar of brind’e su fair share pa gosa di e caida den prijs. Na 2017 a nota un stabilisacion den prijs di crudo a keda na un averahe di US$59 pa bari. Apesar cu tin fluctuacionnan, pa aña 2018 ta premira cu e prijs ta keda rond un averahe di US$59 y pa aña 2019 e pronostico ta keda cerca di US$58 pa bari.
E Parlamentario ta saca conclusion di e pronosticonan aki, cu e fluctuacionnan aki ta temporario. Pa e temponan cu ta bay bin, lo nota un stabilisacion y lo NO bay tin un crecemento drastico manera aña 2008 unda cu el a subi te US$106 pa bari. “Esaki ta un bon noticia. Lamentablemente pa un rato Aruba mester adapta na e prijs pasobra asina e formula di calculacion ta. Una bes cu e prijs stabilisa no ta premira cu esaki lo bay tin un efecto grandi pa Aruba ni e aña aki ni pa e proximo aña. Loke si ta premira ta cu e Gobierno actual entrante juli lo percura pa baha e prijs di coriente, apesar cu e prijs di fuel por subi un poco, paso pueblo merece su parti husto. Esaki segun cu informacion cu e Gobierno actual a informa nos”, Parlamentario Setty Christiaans-Yarzagaray a duna di conoce. Di aki tambe kier a urgi Gobierno pa den tempo cu ta bin haci un revision di e formula di calculacion di prijs di gasolin cu porta mas rasonabel pa e pueblo.