56
SV Estrella vs ASV Riverplate en berdad tabatin un importancia so, esey ta pa Estrella su ranking riba tabla di posicion. E campeon di Copa Betico, a clasifica pa Play-Off caba, pero, lo kier a gana e wega aki paso ainda nan lo tabatin chens di keda na top di tabla di Division Honor si en caso Nacional y Dakota perde nan ultimo wega. Riverplate di Madiki, elimina caba for di contienda pa Play-Off, cu un bastante bon temporada tras di lomba, unda nan a yega cerca di Play-Off, lo kier cuminsa ‘build up’ pa e siguiente campeonato.
E wega tabata di comienso caba di banda pa banda ya cu tur dos ekipo ta conoci pa nan ofensiva, River no sa tin bon defensa, esey tabata semper na “achilles heel” e temporada aki. Estrella ta un ekipo bastante completo den tur aspecto di e wega. E wega di banda pa banda no tabata na un velocidad mucho halto, e tabata tambe limpi y sportief. Ta te na minuut 20 e prome gol a cay pa Estrella pa medio di Joel Geerman despues di un bon penetracion y asistencia di Pheadrick Baromeo. Ta Baromeo mes a hasi e wega 2-0 na minuut 27 caba. Estrella awor dominando, River cu yegadanan sporadico pero no skerpi. Na minuut 34 ta Baromeo atrobe a hera score si no tabata pa e palo di gol. E wega mes a mane bira un “one man show” di Baromeo cu na minuut 40 a bolbe anota pa hasi e wega 3-0 pa e “Naranjadan di Santa Cruz”. Net prome cu halftime Hugo Robert a hasi e wega 4-0.
Den e segundo tempo nada no a cambia, Riverplate cu yegadanan toch pero no peligroso, na minuut 48 ta Estrella mes a bolbe anota pa medio di Hugo Robert atrobe pa hasi e wega 5-0 y net dos minuut despues ta Pheadrick Baromeo mes ta hasi e wega 6-0 pa Estrella cu su di tres gol, un ‘hatrick’! Bon mereci pa e incansabel hungado aki, sin duda y unanimamente nos ‘Man Of the Match’ pa e wega aki pa su tres golnan y asistencia y pa su desempenjo energetico riba cancha.
Jerwin Giel ta hasi e wega 7-0 pa Estrella na minuut 75, ya Riverplate tabata contando e minuut nan pa e wega caba, pero, prome cu esey nan a bay den busca pa e ‘gol di honor’ toch y asina despedi di e campeonato 2017-2018 cu cabes den halto. E gol al fin a yega na minuut 80 den pia di Shakame Stamper, e hoben cortico den estatura pero cu semper a purba y hunga todo por todo. Asina mes tambe e wega a caba net na ora ya cu no tabatin mester di mas tempo. Resultado final Estrella 7 Riverplate 1.
Estrella a keda cu 39 punto den di dos puesto tras di Dakota riba e tabla di posicion, pensando y sonjando cu e Play-Off venidero. Pabien na SV Estrella!