Home » Dakota ta gana e ‘campeonato regular’ di Division Honor derotando RCA 2-0, e tricolornan ta keda elimina.

Dakota ta gana e ‘campeonato regular’ di Division Honor derotando RCA 2-0, e tricolornan ta keda elimina.

by Admin
0 comment 50 views

E ‘Derbi di Aruba’ entre Dakota vs RCA tabatin hopi implicacion riba e tabla di clasificacion final di e campeonato di Division Honor e anja aki. Dakota cu un victoria lo gana e campeonato regular di Division . Honor, RCA cu un victoria lo a keda cu un chens pa bay Play-Off como e di cuarto ekipo, si Britannia lo a perde cu Bubali, simpel, victoria so tabata e tema principal den e wega aki.

E contraste di e dos ekiponan aki no por ta mas duidelijk; Dakota, un ekipo hoben, cu un velocidad impactante, cu ta usa e velocidad ey pa fomenta nan ofensiva potente. RCA ta un ekipo experimenta, di forsa fisico y defensa solido cu mester controla medio-campo pa lansa nan ofensiva. E wega di Dakota ta pa “blitz” cu pressing halto tin biaha, RCA ta depende di kibra wega di e rival, den un ‘build-up’ gradual cu pasenshi.

E wega den e prome 10 minuutnan tabata un di calma pero semper cu un tension grandi, unda e ekiponan tabata mas bien studiando otro pa wak ki movimiento hasi promer, un wega di postura y tactica. Poco poco por wak con Dakota ta hasi nan prome ‘move’, lansando atake di velocidad riba e dos halanan, evitando e wega for di medio campo unda RCA tin mas chens di controla e wega tras di e forsa di nan experiencia, e volantenan Jean Luc Bergen y Jeamir Howell-Brokken y compania. Dakota su strategia tabata semper pa usa nan atakantenan di velocidad mane Ricky Hodge, Sherman Monticeuex y compania sin mester di bataya pa e middenveld ey. Dakota tabata dispuesto pa no bay den un toma y dame fisico cu RCA, pa controla e wega di posesion, cu ta exactamente loke e ekipo di Solito lo tabata kier. RCA tambe lo tabata kier a test e disiplina di Dakota, sacando nan for di nan plan y ritmo di wega, un area unda Dakota sa ta vulnerabel, e wega mental ey.

Despues di e promer 10 minuutnan unda e wega a cuminsa haya forma, RCA tambe ta lansa atakenan, hopi biaha den estilo di contra-golpi ora cu Dakota bay all out den nan atake y perde e bala cu e defensa solido di RCA unda e bala ta bay di biaha pa nan medio campistanan pa disitribucion. Apesar di algun yegada y iniciativa tempran di e kipo di Solito, toch por a sinti cu e wega di RCA no tabata ‘click’ ainda, kizas cu presion pa sali bay busca gol di biaha pa e victoria tan necesario den un wega pa nan bida, tabatin un ‘ansia’ y net nan cu mester di pasenshi pa hunga nan wega. Dakota tambe cu nan velocidad y toke tabata tene e bala for di RCA, factor determinante tambe.

Prome cu e punto di mei ora di wega, na minuut 25 RCA tabatin chens grandi pa anota pero a bay perdi despues di un “double save” di defensa y portero Dakotero Lionel Kaarsbaan, esey a sinti tambe mane cu RCA a perde nan gran chens di e wega, ta manera nan a perde nan aire eynan, que tal si nan a score? Dakota cu ya tabata hayando mas resultado cu nan “high-pressing”, cu bastante bon yegadanan, a sigui ta consistente, e trabou calcula ey a resulta den e gol di Dakota, pa medio di Sherman Monticeuex na minuut 26 den un atake relampago despues cu RCA a perde e bala den un pressing halto di e delanteronan Dakotero, Dakota ariba 1-0, RCA awo tabata sinti mane ta un montanja tin pa subi apesar cu ta un diferencia minimo so. RCA tabatin mas chens despues pero no di calidad, y esey ta ora nan haya e bala, cu tabata menos cada biaha.

Despues di mei ora e tono di e wega tabata faborece Dakota, RCA tabata frustrando poco poco, crucial ta cu ainda nan no por a hunga nan wega realmente, Howell-Brokken no tabata haya bala pa intercepta den medio campo, Bergen no tabata haya suficiente bala pa crea atake pa Santos, Gomez y otronan. Den e minuutnan prome cu halftime RCA tabata purba “slow down”e wega, hayando e bala y hasi toke, wantando e bala un poco, scondiendo e bala for di e velocistanan di Dakota, cu un bon efecto por bisa, pero tempo no ta warda pa RCA y halftime a yega, Dakota cu bentaha di 1-0.

Den segundo tempo, RCA a sali pa busca pa empata e wega, apesar cu un empate no lo ta suficiente pa nan, pa hasi esey nan mester sali ataka y rapido, ta net loke RCA no por hasi, nan no por cu tira bala dilanti y core cu e hungadonan di Dakota, ta con anto awo tambe sin Jean Luc Bergen den volante? cu pa un rason a wordo remplasa na halftime.

Dakota cu mas chens den e prome parti di segundo tempo por a amplia e anotacion si nan tabata mas skerpi dilanti, pa minuut 50 por bisa cu ainda RCA no a haya nan wega. Dakota ta tira mas hende den atake mirando cu RCA ta hayando dificultad pa arma wega, RCA mester a defende sin por respira, pero asina mes debi nan nan experiencia y puro voluntad y berguensa deportivo ta purba tira dilanti tambe, drentando awo den un wega di banda pa banda cu Dakota, un wega cu ta rekeri hopi stamina. Den un di e momentonan ey, ta husto Dakota na minuut 62 den un contra-atake ta haya un penalty, tiro cobra pa Ezra Bosnie pa hasi e wega 2-0 pa e ‘geel cu pretonan’, pa RCA un banjo di awa frieuw.

Awo RCA mester di tres gol pa gana e wega pa tin un chens pa bay Play-Off, pero, tempo ta cabando, frustracion ta drentando, carchinan ta cuminsa cay pa e tricolornan, e ekipo experimenta ta perdiendo nan frieldad di custumber. Toch despues un chens grandi mas pa anota y corta bentaha, ken sa, milager ta existi, pero Digion Ras no ta logra, esey tambe tabata e ‘comienso di e fin’ pa RCA.

Erick Santos ta baha for di tereno despues di e chens di gol di Ras, e ta parce un poco lesiona, golpi nan di bataya, cabes ta abou. E perdida di Santos ta sigui cu un carchi cora pa Howell-Brokken. RCA awo si ta capitulando y sin Bergen, Santos y Howell-Brokken, ta kiko awo? Por wel di cuminsa tira e hoben nan inexperiencia awo riba tereno pa gana un poco experiencia, no pa e anja aki mas si no pa futuro, den un wega di frustracion pa e multiple campeon di Aruba. RCA ta sigui bringa te final toch pero sin resultado, e ultimo dies minuutnan ta mas un despedida cruel for di e campeonato aki unda nan a resurgi den e di dos mita di e campanja, pero un poco laat, nan chens a caba. Dakota en cambio cu un talentoso ekipo hoben a sabi di hunga nan wega, nan a mantene nan disciplina, esey tabata mas importante pa nan, ora cu nan ta concentra y hunga nan wega sin cai den e wega mental y fisico negativo na ‘por’ ta inbatibel.

Dakota asina a resulta di ta e campeon di e campeonato regular cu 41 punto, y awo hunto cu Estrella, Nacional y Britannia lo bay hunga Play-Off, eynan ta bay determina e campeon di Aruba mes. Nos ‘Man Of the Match’ ta Sherman Monticeuex, incansabel delantero di Dakota, anotador di e prome gol, e imagen di e ekipo veloz y potente. Pabien na Dakota cu e logro aki, y pabien tambe na Estrella, Nacional y Britannia pa nan clasificacion pa Play-Off.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio