Home » Parlamentario Arthur Dowers Hulanda a ordena Rudy Croes pa pone radar for di servicio

Parlamentario Arthur Dowers Hulanda a ordena Rudy Croes pa pone radar for di servicio

by Admin
0 comment 73 views

Ora cu ta papia di siguridad nacional, siguridad di pueblo, no tin espacio pa haci weganan politico sin sentido manera ex minister Rudy Croes kier haci, segun miembro di fraccion di AVP, Arthur Dowers ta splica.
E ex minister di husticia den gabinete Mike Eman II a mustra cu ora cu scucha Rudy Croes na nomber di gobierno bisa cu su persona a permiti destruccion di dos radar, ta bolbe confirma di con gobierno di Reino den pasado a dicidi di kita tur poder for di Rudy como titular di husticia lagando su e consehero di gabinete Wever Croes cu solamente su salario y nada mas.
“Ora ta papia di asuntonan asina serio manera siguridad di nos pais, bo mester ta realmente serio y laga tur pero tur tipo di trikinan politico un banda, sigur ora cu esakinan no ta basa riba berdad y ta esun di mas ridiculo cu un hende por papia.
Scuchando declaracion di Rudy cu mi persona como minister lo a destrui radar di cuerpo policial ta mustra cu e ex minister aki ta kere cu tur hende ta guli su cosnan manda abou ya cu no solamente esaki no a cuadra cu berdad, ya cu realmente ningun minister por dicidi di destrui un propiedad asina costoso y importante di pueblo, pero e ta mustra na mes momento un falta di seriedad di su persona pa atende asuntonan asina delicado den e forma corecto.
Ta mas na su luga pa Rudy bin dilanti y conta e berdad di con gobierno Hulandes a ordena su persona y gobierno di MEP, pone for di funcion e radar cu cuerpo policial tabata uzando mirando cu ya caba Kustwacht tabatin su propio radar den servicio.
Hopi cos a pasa pa e decision aki a wordo tuma dor di gobierno Hulandes pero atrobe como persona responsabel ta dificil pa divulga cierto desaroyonan cu a tuma luga, ya cu siguridad di nos pais ta bin na prome luga.
Tin desaroyonan cu a tuma luga caminda na luga di e dos radarnan menciona sirbi e interes general di siguridad di nos pais, a practicamente stroba otro y aki Hulanda a dicidi di actua y a ordena Rudy como minister e tempo ey, pa desactiva e radar cu el a cumpra pa cuerpo politicial.
Mi persona como minister nunca a atende cu e radarnan aki ya cu tabatin un decision caba riba nan pero pa awor Rudy bin dilanti y conta un storia sin pia ni cabes, no ta algo cu ta mustra riba seriedad di gobierno actual pa atende cu siguridad di nos pais,” Parlamentario Arthur Dowers a mustra.
Sr Dowers tambe a atende cu e asunto di cuater auto cu tin para pa algun luna caba y caminda tambe mustra den su direccion cu esakinan no a keda cla pa wordo uza pa cuerpo policial.
El a mustra cu en berdad e autonan aki a yega for di aña pasa pero nan no tabata completamente ekipo pa wordo pone den servicio mesora y mester a inicia henter un proceso pa esaki tuma luga y mientras tanto gobierno a cambia y e gobierno actual tin cu percura pa e autonan aki ta den servicio.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio