Home » Parlamentario di Fraccion AVP Robert Candelaria A yega ora pa kibra e tabu riba abuso sexual na Aruba

Parlamentario di Fraccion AVP Robert Candelaria A yega ora pa kibra e tabu riba abuso sexual na Aruba

by Admin
0 comment 110 views

Karen Henricus contando su experencia di abuso sexual den su buki “Surviving a Pedophile”

ORANJESTAD, Aruba –  Escritora Karen Mademilia Henricus a presenta su buki “Surviving a Pedophile” y Parlamentario di Fraccion AVP Robert Candelaria tabata presente pa asina haya sa mas over di esaki. Den e buki aki e escritora ta conta su historia con el a sobrevivi pedofiel, mientras cu Parlamentario Candelaria ta di opinion cu mester kibra e cadena di tabu pa loke ta trata pedofiel.

Karen Henricus a presenta su buki unda e ta conta con el a experencia abuso sexual den su famia. Pa Parlamentario Candelaria ta spera cu e buki “Surviving a Pedophile”, kibra e tabu cu tin aki na Aruba, unda hende ta durf di papia di esaki, ta durf di bin dilanti y bay haci denuncia. Tambe nan lo bay busca yudansa y no laga e topico aki scondi.

“Mi ta asina contento cu e tabatin e curashi y forsa pa sali padilanti y bisa den detaye kico el a experencia”, Robert Candelaria a indica. Asina aki ta mustra tur hende na Aruba cu tin un persona cu tin e bos, e cara, pa inspira y encurasha otro pa bin dilanti. Comunidad di Aruba mester carga y bisa cu esaki ta algo cu no kier mas. Mester kibra e tabu y cu por mira cambionan pa mehoracion. Parlamentario Candelaria ta felicita Karen Henricus di a tuma e curashi y animo pa bin cu dilanti cu esaki, tambe ta spera cu e buki aki lo por haci un impacto riba comunidad.

E buki di “Surviving a Pedophile” di e escritora ta papia riba e parti di “healing scars” di abuso sexual. El a expresa cu den e buki aki e ta papia riba su experencia di 15 aña di abuso sexualmente, fisicamente y emocionalmente. Karen Henricus a sinti cu a yega ora pa trece esaki dilanti y a dicidi di haci esey, di cual cu e buki aki e kier pone enfasis pa tur hende haya sa kico e daño ta pa un hende of mucha ora di molestia of mishi cun’e, of abusa di dje den tur area.

Tambe skirbiendo e buki aki ta pa yuda e victima bin dilanti, bisa y papia, unda e ta bisa “mi a wordo abusa”. Karen Henricus kier p’e topico aki ta uno mas habri, unda por papia riba dje. “Mi sa cu e no ta facil, e no ta dushi pasobra mi tabata eynan. Mi mes a tarda hopi aña prome cu mi a skirbi, pero mi deseo ta p’e yuda tur caminda cu por, den tur area, den tur bida”. Tur hende cu conoce e escritora, sa cu e ta un persona alegre y esaki ta pasobra semper el a kere den Dios. Pa su persona Dios ta e bron di alegria y goso.

“Mi kier a para keto un rato pa asina duna un palabra di aprecio na: Su excelencia minister di enseñanza, ciencia y desaroyo sostenibel dr. Armando Rudy Lampe. Minister Lampe a bini e anochi aki y a keda presente te na ultimo, sin previo aviso el a wordo invita pa duna algun palabra y a haci esaki tremendamente. Masha danki Minister, mi ta contento di por a cera conoci cu Minister.
Dios bendiciona y guia Minister y dun’e sabiduria, bida y salud pa asina e por sigui ta un persona simpel, humilde y cu un tremendo curason. Mi kier a probecha na e mesun momento tambe pa gradici Hyatt Regency Resort Spa & Casino pa nan hospitalidad”, Karen Henricus a remarca.

E ta manda un danki enorme na e team cu a sostene durante di tur e proceso. “Danki di henter mi curason pa haci mi anochi un blessed night and a night 2 remember. Karina Williams, Marisella Croes-Figaroa, Maritza Van Romondt Kuiperi, Tais Mercera, Carol Larmonie-Kock & Mariana Jimenez! Danki di henter mi curason. Rosa-Maria Gomez, Omashallee Kelly, Vero Mackay-Werleman & Bryan Huntington danki, mi sa cu mi por a biaha bay bin bek y laga hopi cos den boso man. Natalie Luysterburg, you are the best! Robert Candelaria & Jairzinho Tromp boso ta tremendo y mey, masha danki pa boso trabou incansabel. Liki Perez, Molly Kock Lesvia Kock & Jasmine Kelly, danki di mas danki. Juemy Hernandez, Rosaina E. Hirschfeld & Shairine Kock, boso ta all master, danki. Linda Trimon y Prisca Winterdaal Masha danki damanan. Sandra van der Hans, Marlon Vrolijk, Mirna Hermans-Jaquin, Jarvis Winklaar Ev Granviel & Jessy Granviel-Ansano masha danki pa boso disponibilidad. Na mi rumannan Mily Molina-Granviel, Gwendolyn Winklaar & Kirsten Lyneth Conquet-Henricus you are di mas special 2 me, love you di mas. Xandreah van Romondt, Edsel Granviel & Eddison Mademilia the best Madrina & Padrino’s ever! Elvia Henricus-Kock, mi ehempel! Danki na cada un di boso cu tabata t’ey e anochi aki di mi book Launching “you are special” di mas special 2 me and you know who you are. Y por ultimo, mi kier pidi miles di disculpa si mi por a lubida di gradici un persona. Den mi entusiasmo y emocion mi por a miss di gradici bo persona, despensa mi pa esey”, el a termina bisando.

 

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio