Parlamentario Endy Croes ta splica cu e lo no laga nada di politiconan di AVP pasa y lo reacciona riba tur. Mester desenmascara tur e integrantenan di AVP basa riba e desaster cu nan a laga atras y e maneho coruptivo y di “LADRON” cu nan a hiba 8 aña largo. Por a tuma nota den prensa cu net Richard Arends kende tin e ilusion pa bira e proximo lider di AVP kier duna conseho na Coalicion con nan mester maneha placa di pais Aruba y kico nan mester paga cu “meevallers”.
Richard Arends a djis quote rapport CAFT di Maart 2018 cual a menciona locual Richard Arends awe kier trece dilanti. Meevallers ta momento pais Aruba ricibi mas placa cu a premira. Laga mi duna un ehempel mas cla: Pais Aruba den su presupuesto actual NO a tene cuenta cu ningun entrada di CITGO como cu nos sa di e situacion. Ban supone cu CITGO logra haya financiamento toch y haci un pago atrasa di laga nos bisa 50 miyon florin den aña 2018, esaki ta bira un “meevaller”. Pues un placa cu no tabata presupuesta cu lo drenta caha di gobierno como adicional. Richard Arends den prensa ta duna splicacion na Coalicion cu cualkier meevaller cu Gobierno ricibi lo mester wordo aloca completamente y directamente pa reduccion di e deficit.
Un persona kende a traha rapport FESCA, a traha Plan Aruba Ariba 2009 y a traha riba 2 presupuesto alternativo pa Pais Aruba cual ningun a resulta. Resultado berdadero di Richard Arends su fantasia y rapportnan a culmina cu e debe di pais Aruba a crece di 41.7% di nos GDP na 2008 pa 93% di GDP na 2018. Abo awor kier duna conseho? Awe 93 cen di cada florin cu drenta caha di gobierno ta comprometi na debe, danki na Mike Eman y Richard Arends. Awe Aruba ta paga 216 MIYON na interes solamente danki na e maneho di Richards Arends y Mike Eman. Richard Arends tabata consehero di Gobierno cobrando schaal 16 desde 2009 te na Augustus 2014. Na Augustus 2014 Richard Arends a usa un otro “truco” y a bandona e posicion di consehero cu schaal 16 y a contracta un compania cu yama Horizon Consultancy pa duna conseho na gobierno. A bin resulta cu e doño exclusivo di Horizon Consultancy ta e propio Richard Arends cu a cobra Gobierno di pais Aruba 500 mil florin pa su servicio.
Despues Richard a bira Minister y awe ta Parlamentario. E meneer aki a strica 2 MIYON di Pais Aruba sin tene cuenta cu e deficitnan desde 2010 te cu 2017. E meneer aki ta coresponsabel y a redobla debe nacional di Pais Aruba di 2.1 BIYON na 2009 pa 4.2 BIYON na final di 2017. E meneer aki tambe ta pertenece na e “lobonan cu ta cana rond bisti den cuero di carne”. Anto awe ABO tin cuero di cara pa bin bisa Coalicion unda mester aloca posibel meevallers di 2018. Nos lo keda publica tur e berdadnan pa pueblo siña conoce esnan cu a causa e desaster na nos pais y awe kier cana rond manera nada no a pasa. Baha na awa ohm!!!!