Parlamentario Richard Arends Cantidad di mocion ta mustra cu presupuesto ta incompleto

Fraccionnan den Parlamento cu ta sostene gobierno, a aproba presupuesto 2018 diamars ultimo, un presupuesto cu despues di cuater nota di cambio, a conoce un aumento di gasto di 22 miyon florin.
Parlamentario Richard Arends a mustra cu desafortunadamente esfuersonan haci di parti di fraccion di AVP no a wordo sosteni caminda entro otro a presenta un mocion caminda si ta premira posibel ‘meevallers’ den entradanan di gobierno cu esakinan por wordo aloca completamente y directamente pa reduccion di deficit, pero esaki a wordo bari for di mesa.
“Gobierno a opta tog pa si tin ‘meevallers’ parti 50% pa reduccion di deficit y 50% pa gastonan cu ainda mester bin.
Atrobe nos a trata un presupuesto incompleto, un presupuesto cu no ta contene e cuadro financiero pa loke ta trata e pakete di compensacion cu nos tabatin, a wordo bisa cu lo trece den un ley apart pero ta hopi dificil di kere cu esaki lo no tin repercusionnan pa cu presupuesto, si nos wak solamente cu reduccion di e prima di AZV, ta costa alrededor 20 miyon di florin.
E falta di vision, e falta di maneho tabata bisto, wordo priminti cu lo bin e ‘speerpunten’ pa henter e gabinete lo a wordo treci dilanti den e presupuesto 2018 pero e punto ey a wordo aplasa y awor lo wordo inclui den presupuesto 2019 y ora nos lo bay wak kico ta e vision y maneho di e gobierno aki.
Esaki a wordo demostra tambe pa e cantidad record di mocion cu a wordo presenta, mayoria di nan dor di mesun partidonan cu ta sostene coalicion, cu ta demostra cu e maneho tin mester di mas ‘bijsturing’ y obviamente ta limita e espacio di gobierno pa por actua,” Parlamentario Richard Arends a declara.