Parlamentario Mervin Wyatt Ras a mustra cu apesar cu presupuesto 2018 a keda aproba den Parlamento, caminda gobierno a anuncia medidanan pero na mes momento por a tuma nota cu gasto di personal a subi mientras cu tambe tin otro gastonan cu a subi manera gastonan di auto, di goederen en diensten.
E miembro di fraccion di AVP a sigui mustra cu Raad van Advies ya caba a señala cu gobierno no a duna un splicacion bon di e diferente postnan, di gastonan cu ta bay tin y di diferente proyecto cu a wordo menciona y no por wak esaki tampoco bek den e cifranan.
Sra Wyatt Ras a mustra na mes momento cu Raad van Advies a duna gobierno un ‘dikke onvoldoende’ pa loke ta presupuesto 2018.
“Den e presupuesto gobierno a presenta un plan di crisis social caminda mi persona sigur ta para su tras caminda mi ta kere cu ta sumamente importante pa e sector social keda haya sosten, pero kico nos por a mira cu dado momento gobierno a presenta un nota di cambio na unda nan ta kita 5.6 miyon for di e plan aki.
Si mi persona no a bay den prensa y denuncia e maniobra aki lo no a bin cambio pa cu esaki y mesora cu nan a ripara e denuncia aki, gobierno a dicidi di bolbe pone e placa aki bek, bolbe entrega otro nota di cambio y esaki a mustra con cla cu gobierno no ta serio den su maneho,” Parlamentario Mervin Wyatt Ras a declara.
E miembro di fraccion di AVP sigui mustra cu durante di e reunion tambe e miembro di fraccion di RED, Ricardo Croes a presenta un mocion caminda nan kier mira cannabis medicinal wordo legalisa y ta algo cu gobierno actual a mustra na varios ocasion cu nan kier haci di cannabis medicinal, un di dos pilar economico pa nos pais.
Sinembargo den e mocion di Ricardo Croes el a trata di haya sosten pa e test di uzo di droga na trabou esaki por wordo amplia pero ta algo cu fraccion di AVP no por a sostene ya cu no por a saca mucho afo e intencion tras di esaki y na unda lo kier a bay cu e tipo di maneho aki, Mervin Wyatt Ras a señala.
Parlamentario Mervin Wyatt Ras Gobierno kier a kita 5.6 miyon for di post maneho social
109