Lider di fraccion Marlon Sneek Minister a sconde rapport di Banco Central pa parlamento riba ‘economic forecast’

Un gobierno cu ta papia asina hopi di transparencia y integridad, na momento cu in cu demostra esaki, ta viola tur regla di transparencia y integridad, sigur ora cu ta bin sali na cla cu Ministe di Finansa manipula parlamento, e organo cu mester controla e maneho di gobierno.
Esaki lider di fraccion di AVP den Parlamento, sr Marlon Sneek ta mustra ora cu dos dia despues cu a caba cu tratamento di presupuesto 2018 y cu a wordo aproba cu sosten di e tres fraccionnan cu ta sostene gobierno.
“Un gobierno cu a priminti cu number un pa nan ta bay ta transparencia, awe no por mira cu nan no tabata transparente. Un di e puntonan importante pa nos tabata pa haya e rapport di Banco Central cu ta presenta e ‘economic forecast’ pa pais Aruba, nos a ripara cu ora nos a trata e presupuesto, nos no a haya e documento aki y un dia despues diripiente minister ta manda e documento pa nos.
Kico nos por mira cu e presupuesto cu gabinete Wever Croes a presenta nos, ta un presupuesto ficticio, un presupuesto cu ta bisa cu lo bay tin un crecemento economico di 1%, hasta e minister a bisa cu el a tum’e conservativo, paso segun su persona ta 3% ta bay tin di crecemento y awor cu nos mira e ‘economico forecast’ cu nos a haya presenta di Banco Central, cu e minister a tene atras, cu minister no presenta durante tratamento di presupuesto.
Ta despues di reunion el a entrega esaki, nos a bin ripara cu e documento aki ta presenta nos un ‘economico forecast’ di 0.3% cu ta tres biaha menos cu gobierno a pone den su presupuesto.
Pues minister bin parlamento, gaña parlamento den parlamento cu e no tin e documento, bisando cu economia lo crece mas cu 1%, cu su persona lo bay tum’e na 1% y awor Banco Central ta papia di un crecemento di 0.3%.
Esey no ta tur ya cu den Banco Central su analisis di ‘economic outlook’ ta mustra cu ainda nan no a tuma den consideracion, e hecho cu gobierno kier bin kita 10 miyon mas for di pueblo, hisando accijns cu 10 cen, biniendo c’un BBO casi dobel c’un aumento di 2.5%, Banco Central no a tene cuenta cu esakinan den su outlook.
Pues e outlook di Banco Central ta bisa cu e outlook lo bay ta 0.3% sin cu nan a tene cuenta cu medidanan cu gobierno ta bay tuma, pues lo bay bin un outlook nobo y caminda nan ta anticipa cu e medidanan aki lo bay percura pa un efecto grandi riba inflacion y consumo.
Ora un medida lo bay tin efecto riba consumo, e crecemento economico ta bay cay, sigur riba inflacion pasobra tur hende sa cu na momento gasolin subi, e comerciante ta bay pasa e aumento aki bek den su prijsnan.
Un gobierno c’un presupuesto caminda nan ta bay gasta 100 miyon mas en comparacion cu e presupuesto 2017, por mira cu e gobierno aki ta presenta un presupuesto irealistico caminda ta bisa cu ta bay tin un crecemento economico di 1%, Banco Central ta bisa cu e crecemento aki ta 0.3%, sin cu nan tene cuenta ainda cu e impacto di e medidanan cu gobierno ta bin cu’ne pa haya mas placa na entrada.
Esaki ta algo inaceptabel y sigur nos lo bay wak kico CAFT ta bay duna su advies riba e presupuesto aki, sigura mirando cu e presupuesto cu mester wordo entrega cu un 0 plus di 0.5%, awe tin un deficit di 3%, pues un presupuesto cu tin casi 8 biaha mas gasto en comparacion cu loke e mester ta.
Tur hende sa cu CAFT ta traha via ley di LAFT cu no ta duna espacio pa esaki y nos lo mira kico lo bira e advies riba e presupuesto aproba pa e stempel parlament di MepPorred, ya cu prome cu a trata e presupuesto, ya caba nan a bisa cu nan lo aproba esaki.
Sigur algo lamentabel cu parlamento a wordo engaña, pasobra e rapport aki parlamento no a hay e rapport di Banco Central prome cu tratamento di e presupuesto apesar cu e tabatin esaki den su poder,” Parlamentario Marlon Sneek a declara.