Paradera – Diasabra marduga den careda di 12:45 polis a wordo manda altura di Pacifico Paradera, pa un accidente cu hende herida.
Na yegada di polis nan ta topa na e splitsing cu ta sali dilanti Pacifico Restaurant, dos auto kibra.
Tawata trata di un Altezza y un Kia Sportage.
Den ambos auto tawata tin dos dama herida.
Loke a sosode
E Kia Sportage a bay subi caminda y posiblemente no a calcula e velocidad y distancia di e Altezza.
Pa ora cu e chauffeur di e Kia Sportage a bay trata di evita e impacto tawata laat, e Altezza a dal e Kia den porta banda robes patras. E Kia a bay para otro banda di caminda, y e Altezza cu tawata bayendo pabou, debi na e impacto a bira bek cara pariba.
Un dama sinta patras den e Kia a resulta herida y tawata sangra.
Den e Altezza tawata tin un dama gritando di dolor.
Personal di e ambulancenan cu a yega na e sitio a hiba ambos dama herida pa Hospitaal.