Home » Un colega critico y ehemplar na Sala di Operacion Deetje a bira empleado di luna di maart na Hospital

Un colega critico y ehemplar na Sala di Operacion Deetje a bira empleado di luna di maart na Hospital

by Admin
0 comment 81 views

ORANJESTAD, Aruba: Recientemente Hospital a saca nan empleado di luna di maart cu a keda den persona di Deirdre Mulder, miho conoci como Deetje cu ta traha na Sala di Operacion. Den un ambiente ameno unda cu tur empleado di sala di operacion a bini hunto, Director di Cuido, sr. Ezzard Cilié, a revela kende a bira empleado di luna. Un sorpresa grandi pa Deetje Mulder cu no a spera esaki mes.

Deetje Mulder no a spera cu e lo ta e empleado di luna y e tabata sumamente sorprendi. Tur hende tabata pensa ken por ta e empleado di luna y nunca ela pensa cu e of un di su coleganan lo cay den nominacion ya cu nan ta hopi critico. Deetje Mulder a cuminsa traha desde 1997 den sala di operacion na Aruba, aunke el a bay 1 aña Hulanda. E ta gusta traha na Aruba pasobra e team ta uno hopi leuk y nan ta traha bon cu otro. Den sala di operacion semper nan tin yen cos di haci y e trabou ta varia; esey ta algo cu e ta gusta di su trabou. E ta haciendo e trabou aki pa 28 aña caba y ainda e ta gusta haci esaki ya cu e ta haya cu e trabou aki ta pas p’e y cu tabata un bon escogencia. Deetje ta hopi contento cu e bunita reconocimento aki unda cu tur colega y management a para tras di e nominacion.

A scoge Deetje Mulder como e empleado di luna pa motibo cu e ta hopi involucra cu e piso, asina Mark Veenendaal, zorgmanager di Sala di Operacion, a duna di conoce. E ta un persona cu semper sa kico tur ta pasa riba e piso y e tin hopi conocemento cu e ta comparti cu su coleganan. Tambe e por ta un persona hopi critico y directo pero semper Deetje ta tuma iniciativanan pa mehoracion den diferente area.

Pa hopi aña caba e ta un empuhe grandi pa yega na mehoracionnan riba su piso y unda cu por, pa henter Hospital.  Aunke hecho ta cu e desaroyonan tin biaha ta tuma basta tempo, e tin un virtud importante cu ta pasenshi. Asina cu e mira posibilidad nan nobo pa mehora, e ta bay cerca management unda cu no solamente e ta indica kico por miho pero tambe e ta investiga y splica con pa realisa esaki. Despues e ta sigui tira un bista riba e proceso. Deetje asina semper ta percura pa tur colega y tambe pashent y operadornan ta satisfecho door di bini cu ideanan pa mehora servicio. Masha pabien Deetje!

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio