Muhe cu a come na restaurant no kier a paga su cuenta. Durante su detencion elo a agredi un agente policial

Algun rato prome, asistencia di polis a wordo pidi na e restaurant aki.

Motibo tawata, cu e muhe aki a bay come pero na final e no kier a paga su cuenta.

Segun nos por a compronde, e cuenta lo a sali rond di 90$.

E muhe cu a yega den su auto, un Daihatsu Materia a laga e motor cendi henter ora cu e tawata come. Nos por a wak cu e auto tawata habri y motor cendi, algo no normal si bo ta bay paden come pa algun rato.

Ni cu nada, e muhe no kier a rasona. No a keda e agentenan nada otro pa bay over na detene e persona aki cu tawata actuando hopi straño tambe.

Lamentablemente e detencion no a bay facil, ela resisti fuertemente y te hasta a dal un di e polisnan.

Despues di un lucha e agentenan a logra pone e muhe den boei, wardando ariba transportwagen.

Na yegada di transportwagen, e muhe tawata grita un monton di palabranan sushi den direccion di e polisnan. Por wak e tawata soda profusamente.

Despues cu transport a bay cu e muhe, agentenan a paga e motor di e auto y a bandona e sitio.