Awor nos por sigui cu e otro trabaonan na bienestar di nos pais
ORANJESTAD – Minister di Finanzas, Asuntonan Economico y Cultura señora mr. Xiomara Ruiz-Maduro dialuna tabata den Parlamento di Aruba pa e debate riba Presupuesto 2018. E mandatario durante su presentacion a brinda un splicacion amplio riba e reto financiero di nos Pais y con Gobierno ta atende esaki cu pasonan firme pa recupera credibilidad financiero di nos Pais. E ta un esfuerso grandi mirando e hecho cu Gobierno anterior cu nan mal maneho a causa hopi daño na e credibilidad financiero di nos pais.
Ademas e mandatario a amplia tambe riba e esfuersonan riba e tereno economico y e vision pa biba e cultura di nos Pais.
“Tabata hopi dia, hopi ora y esfuerso pero nos por ta contento y agradecido cu nos por a logra pasa nos prome presupuesto den Parlamento”, asina e mandatario a trece dilanti.
Minister Ruiz-Maduro ta yama un danki di curason na tur profesional cu a yuda nos grandemente, un danki special na bureau MinFEC, danki na tur colega Ministers specialmente Minister President Señora mr. Evelyn Wever-Croes, como tambe danki na Fraccion di MEP, POR y RED.
Tambe Minister Ruiz-Maduro a gradici su famia pa nan pasenshi y hopi danki na Dios pa e forsa, pasenshi y sabiduria di palabra.
“Presupuesto 2018 di pais Aruba a bira un realidad y awor nos por sigui cu e otro trabounan na bienestar di nos Pais”, Minister Ruiz-Maduro a enfatisa.
