Parlamentaria Marisol Lopez-Tromp cu mocion pa haci un investigacion forensico riba ex minister di Infrastructura y Integracion

Parlamentaria Marisol Lopez-Tromp den su disertacion den reunion publico di diamars a presenta un mocion cu ta pidi un investigacion forensico riba ex minister di Infrastructura y Integracion, Benny Sevinger.
El a bisa cu Minister Otmar Oduber a haya un situacion caotico den e cartera di infrastructura. A haya foutnan, actonan castigabel y actonan contra ley asina grandi cu casi ta impedi e mandatario nobo pa eherce su trabou.
Tristo di esaki ta cu en bes cu e ex mandatario acepta cu cosnan por a bay fout y cu cosnan por a cana na otro forma, e ta keda defende den sala di Parlamento, e biaha aki como parlamentario, loke el a haci. E ta bay asina leu di bisa cu e no ta ‘give a damn’ y cu e mandatario awo mester ‘deal cune’, un actitud cu ta hopi peligroso pa un pais y posiblemente hasta pa e mes.
Ya caba durante Gabinete Mike Eman II a presenta un mocion di desconfiansa contra ex minister Benny Sevinger, mocion cu Lopez-Tromp mes a sostene mirando e desaroyo cu por a wordo mira pa loke ta maneho di e ex mandatario. Lamentablemente e tempo ey e mocion aki no a haya e sosten di mayoria di Parlamento y awe Aruba ta pagando e consecuencianan.
Teniendo na cuenta loke a haya y specialmente cu e meta pa evita cu loke a tuma lugar den pasado bolbe tuma lugar y cu e vision di promove integridad den gobernacion, Marisol Lopez-Tromp a presenta un mocion pa bin cu un investigacion forensico cu ta bisa:
Considerando:
E echo cu tin un cantidad di casonan dudoso, ilegal y/of fraudulento di tereno comercial bou di Gabinete Mike Eman I y II door di e Minister di Infrastructura y Integracion entre 2009 pa 2017;
E echo cu dicho ex minister no tabatin un maneho ni tabata tene su mes na proceduranan di bon gobernacion pa loke ta e decisionnan cu e tabata tuma diariamente pa cu otorgamento di parcelanan den erfpacht; Cu e ex minister di Infrastructura y Integracion tabata viola e ROP constantemente y tabata malinforma pueblo y a forma practicamente un grupo di persona rond di su persona como minister cu lo tabata yude regla tereno contra tur procedura sin consulta cu DIP;
Cu e minister di Infrastructura y Integracion di 2009 pa 2017 tabata cobra inversionistanan 5 promil di nan inversion di construccion di nan proyecto y tabata dicidi cuanto, unda y con e inversionista mester stort e placa contra nos ley di contabilidad; Cu Gobierno actual a bin topa un situacion caotico den DIP caminda cu e ex minister di Infrastructura y Integracion no a percura pa tin un maneho di otorgamento di erfpacht y sin pidi conseho di DIP y sin tene cuenta cu loke realmente tin dipsonibel na tereno pa otorga; Cu na varios ocasion huez a bati ex minister Sevinger riba su dede debi cu e ta actuando contra ley como minister den su aprobacionnan di peticionnan pa construccion y cu e ta mishi y desestabilisa nos estado di derecho; Cu tin hopi ciudadano a indica cu nan a paga pa haya tereno.
Ta dicidi:
Pa instrui Gobierno pa laga haci un investigacion (forensico) den DIP riba tur iregularidadnan den otorgamento di tereno pa cas y comercial durante gobernacion di ex minister di Infrastructura y Integracion; Investiga e toewijzing di casnan na Seroe Colorado; Investiga con ex minister Sevinger a malusa e clausula di maatschappelijke investering cual sumanan nunca lo mester a wordo gestort, pero mester a tuma lugar den forma di material en natura; Entrega keho a base di e iregularidadnan cu a ser haya.
Parlamentaria Marisol Lopez-Tromp ta spera di por conta cu sosten di tur miembro di Parlamento pa cu e mocion aki y asina promove y para pa un gobernacion cu ta wordo guia pa integridad.