Den pasado a yega di bin dilanti e posibilidad pa desaroya un terminal di Fast Ferry na San Nicolas. E proyecto aki tabata data for cuminsamento di añanan 90, pero diferente aspecto a stroba p’e bira un realidad.
Na 2016 e oportunidad a bolbe presenta pa realisa e proyecto di Fast Ferry pa Aruba, pero Gabinete Mike Eman II a simplemente bent’e den lachi di olvido.
Minister Chris Romero si a tuma e proyecto di Fast Ferry cu dos man, como cu semper el a mira e importancia cu esaki tin pa Aruba su economia.
Gobierno di Aruba actualmente ta den combersacion cu tur partners involucra pa cu realisacion di e Fast Ferry na San Nicolas.
Algun dia atras Minister Chris Romero, hunto cu su ekipo di trabou, a sinta cu sr. Rafael Estrada y sr. Ton Janssen cu ta e personanan cu a trese e proyecto aki na Aruba.
Asina cu Gabinete Wever-Croes a keda instala, Minister Chris Romero a cuminsa mobilisa pa hasi e proyecto di Fast Ferry un realidad pa Aruba, y specialmente pa pueblo di San Nicolas.
E siguiente paso pa cu e proyecto di Fast Ferry lo bay ta pa present’e na Parlamento pa asina haya e aprobacion necesario pa por continua na e fase di realisacion.
Conhuntamente cu Ministernan Dangui Oduber, Andin Bikker y Otmar Oduber, lo bay firma un MoU entre Aruba, Boneiro y Corsou.
E Fast Ferry lo conecta Aruba, Boneiro y Corsou via lama y na un prijs mas economico, compara cu transporte aereo, cual tambe lo contribui na crecemento turistico pa nos isla. Como tal mester firma acuerdonan entre e islanan ABC pa asina e proyecto aki por bira un realidad, como cu e ta representa un beneficio no solamente pa Aruba, pero tambe pa nos islanan ruman.
Estudionan di logistica ta indica cu e localidad ideal pa un Fast Ferry na Aruba lo ta na San Nicolas. Y esaki ta exactamente unda nos Gobierno lo construi e waf pa e Fast Ferry.
Construccion di un waf pa e Fast Ferry na San Nicolas lo stimula e crecemento economico pariba di brug.
Creando cuponan nobo di trabou pa nos localnan, e proyecto di Fast Ferry pa Aruba lo traduci den un incentivo mas den pro di nos economia, cual lo atrae tambe inversionistanan local y internacional pa inverti den San Nicolas.
Den su compromiso pa trece un miho futuro pa San Nicolas y Aruba en general, Minister Chris Romero ta trahando incansablemente pa sigui bin cu proyectonan cu lo beneficia nos comunidad den tur aspecto posibel.