Como educador semper bo ta haci lo maximo pa educacion por trece cambio den nos muchanan. No solamente door di duna les pero tambe duna contenido pa locual ta bida y sigur respet pa hende y stimula e alumno su autoestima den tur e problemanan cu nan tin rond di nan pa nan por ta un bon ser humano cu lo tin e speransa di por yega mas leu posibel den bida. Un lema cu semper mi ta usa: den tur malo abo ta esun cu por trece cambio na esaki y sigur keda critico y para pa bo idealnan y bo soñonan.
Cu e mensahe aki mi a cuminsa mi discurso den sala di Parlamento pa recordami pakico mi ta den parlamento, unda cu mi tin e obligacion di sirbi mi pais hibando un control critico y alcaso. Un punto cu mi persona a tuma hopi na serio den e programa di ‘Hunto pa Aruba’ ta unda cu e participacion (medezeggingsschap) di docentenan mester ta prioridad y mester duna contenido na esaki. Sigur teniendo cuenta cu e voz y conocemento di docentenan mi tin sigur cu nos por trece cambionan practico a corto plazo caminda e docentenan y alumnonan por sinti diferencia pero sigur e prome stap pa mehoracion di calidad. Hunto por sigui traha plannan a medio y largo plazo na bienestar di enseñansa.
Dos punto sigur di preocupacion cu nos di parlamento a bin topa na caminda pa tratamento di presupuesto 2018 ta e independisacion di DPS y Centro Multi Disciplinario cu lo kier a cera esaki. Den tratamento di presupuesto mi persona a enfatisa y trece dilanti ponencianan di preocupacion bou di e cuerpo di docentenan pa locual ta trata nan posicion huridico y alaves a accentua cu na e momentonan aki Minister no ta conta cu e draagvlak necesario. Siguramente mi persona a bin pa sirbi pueblo y docentenan ta parti di pueblo y unda sin nan autorisacion no por para tras di e independisacion di DPS. Dia cu cuerpo di docentenan dicidi di bay cu e cambio lo mi sostene nan decision y esaki ta muestra di e aspecto di Medezeggingsschap.
Pa termina mi ta bisa cu semper nos ta habri pa cambio pero actualmente mi ta contra e decision aki, no paso mi ta contra pa ta contra, pasobra si mi no bisa esaki lo mi no ta sincero cu mi mes ni mi coleganan pa laga e oportunidad pasa sin haci uso di mi derecho pa urgi e minister pa pone e plannan aki cu actualmente a trece hopi discordia, desunion, demotivacion cu no ta traha na beneficio di educacion di e pais, pa evalua e plannan y pa busca e mihor alternativa cu apoyo di docentenan pa nos por mehora calidad di educacion.
