Dialuna mainta den presencia di diferente partners den salubridad, manera AZV, HOH y muy especialmente esnan di Baptist Health International a tuma lugar e “masterplan kick-off event” pa cu e renobacion y expansion di ImSan. Durante e evento Minister di Turismo, Salubridad y Deporte Sr. Dangui Oduber a splica un poco ariba e ampliacion di ImSan y kiko tur esaki ta nifica pa nos pais.
“Nos lo habri 3 camber di operacion. Dos lo ta pa cirugia general y uno pa operacion di wowo. Nos lo bai brinda tambe radiotherapie bestraling. Esaki ta algo cu no ta sosodiendo na Aruba actualmente. E camber pa cirugia general lo ta pa dagbehandelingen (opera mainta y bay cas atardi). Actualmente pashent nan cu mester wordo opera di retina ta wordo manda pa exterior. Pronto esaki no lo ta necesario mas ya cu e camber di operacion nan di wowo lo inclui operacion di retina. Tur “diagnostische oogbehandelingen” tambe lo tuma lugar na ImSan. Nos imaging department lo haya un CT scanner.”
Manera ta conoci caba Minister Dangui Oduber den un par di luna so como minister di salubridad, ta hasiendo diferente cambionan pa reduci e problematica di lista di espera cu tin pa specialistanan y tambe na Spoed Eisende Hulp. Expansion y renobacion di ImSan sigur ta un di e solucionnan na bienestar di cada un di nos cuidadanonan. Minister Dangui Oduber ta compromete su mes na sigui informa nos pueblo di e progreso di diferente puntonan di accion riba agenda pa cu mehoracion di calidad di nos cuido medico.
