Minister Dangui Oduber: Nos a haya salubridad publico total los

Minister di Salubridad Publico Sr. Dangui Oduber a presenta su maneho pa cu salubridad na Parlamento di Aruba den e reunion di presupuesto 2018. E mandatario a recorda opositornan di e situation caotico cu e la haya Salubridad Publico. Pa 8 aña largo edificionan no a haya ningun atencion. A haya e edificio di ex BGD caminda SVB ta situa cu ta casi cai den otro y tambe edificio di SABA den mal estado. Apesar di e situacion financiero, gobierno a pone 500 mil florin den e presupuesto pa renobacion di e cushina di SABA. Poco poco nos lo cumpli cu tur nos debernan como Gobierno. Den 8 aña nos tabata tin dos Dokter como Minister cu no a haci net nada pa Salubridad. Ministernan cu pa 8 aña largo no a duna atencion na cuido mental. E mandatario a bisa cu tin un plan pa cuido mental y manera esaki concretisa lo presenta esaki den Parlamento. E mandatario a trese dilanti cu den 4 luna di tempo a tuma e decision pa reduci e lista di espera pa wordo atendi pa un specialista y tambe pa reduci e tempo di espera na SEH (eerste hulp) door di pone 2 dokter di cas extra pa atende cu e pashentnan y asina mehora e servicio pa e aseguradonan. ARUBIG tambe ta den su fase final pa bira un realidad, esaki lo haci posibel pa reconoce nos dokternan cu a studia den region. AZV ta bai haya un director nobo y ya caba tin estudio nan haci con ta bai haci pa baha e gastonan di AZV pasobra simplemente no por carga e gastonan aki mas. Segun Minister Dangui Oduber e proyecto di Hospital na aruba ta esun mas costoso di mundo “per vierkante meter”. Un proyecto unda “bid fixing” a tuma lugar y acuerdonan dudoso tuma pa ex mandatarionan. Un budget inicial di 250 miyon, awor aki e proyecto aki ta costando pueblo 360 miyon sin conta e interes. Esaki tabata pa mal maneho unda a laga sala di operacion, intensive care unit y medium care unit y asina por keda menciona hopi cos mas cu a wordo lubida. Pueblo lo mester bai paga 30 aña largo pa e proyecto di Hospital. Esaki ta e unico proyecto na mundo cu e contratista no ta para responsabel pa nan retraso den finalisa e proyecto. Pueblo ta pagando 90 mil dollar pa cada siman cu esaki no ta cla y nuin hende no kier para responsabel. Pueblo por ta sigur cu e proyecto aki lo wordo investiga.