Siman pasa durante prome dianan di tratamento di presupuesto, Parlamentario di POR, Alan Howell tabata hopi directo y fuerte pa loke ta cierto aspectonan cu na su parecer a tuma lugar na un manera incorecto durante periodo di gobernacion anterior.
Un di e partinan cu el a menciona a bay robes ta easunto di rijbewijs. Tur hende por corda cu a crea hopi duda riba e confiabilidad di e documento aki cu a wordo considera cu e sistema con e ta wordo traha no por ta uno confiabel despues di e cambionan cu e ex minister di Husticia a haci y cu a costa caha di pueblo 295 mil Florin. E Sistema manera cu e rijbewijs ta wordo procesa awor aki ta uno sumamente peligroso debi cu e no ta uno ‘fraudeloos’. Peor ainda ta cu a gasta e placa aki sin cu a bay via un destaho publico, siendo cu ley di contabilidad ta bisa claramente cu pa cualkier suma mas halto cu 100 mil Florin mester bay un destaho publico. Mas ainda teniendo e opcion di por a uza un aplicacion di Registro Civil totalmente confiabel y existente caba cu por a wordo adapta pa traha rijbewijs. Si a haci uzo di e sistema di Censo no lo a costa pueblo casi nada mirando cu e tey caba.
Den Parlamento Alan Howell a declara “Mi mama y mi tata a siñami cu ora bo ta fout bo tin cu keda keto yacepta cu bo ta fout, bo no por ta ‘wrong and strong’, pero parse cu no tur hende a siña esey. 295 mil Florin a strica sin bay destaho publico, esey ta loke ex minister Dowers a laga atras pa un proyecto di rijbewijs cu a wordo critica masha hopi mes debi na su falta di confiabilidad! Ma bin den Parlamento pa traha na bienestar di pueblo, pero ta parse cu ma bin akiden pa cera hende…tin un par di hende cu parse cu kier bay cera y investigacion ta mi kuki di cada dia. Ki mishi bo ta cera un deal di 295 mil Florin sin bay openbare aanbesteding. Si ta placa di e ex minister ta su cuenta, pero aki ta trata di placa di pueblo, esey no por!”
A pesar cu e ex minister Dowers a purba di hustifica su actuacion biniendo cu un cantidad di comentario sin base, ta keda un echo cu Parlamentario Howell a desenmascara un proyecto cu keto bay ta dudoso y cu a costa nos pueblo un suma di 295 mil Florin sin cu a bay destaho publico. Un proyecto di rijbewijs cu keto bay tin duda riba dje debi na e erornan cu por tin riba dje.
Parlamentario di POR ta indica cu e aplicacion di Censo cu yama CAS, cual por wordo adapta pa procesa rijbewijs tambe manera a wordo menciona ariba, e polisnan por haci uzo tambe di e tecnologia di por wak nomber y cara di e personanan durante un asistencia den e auto di polis na momento cu esakinan conta cu e laptopnan cu lo wordo instala den nan.
Pesey Alan Howell a bisa cu mester investiga e cos aki hopi bon, pero tambe a presenta un mocion pa asina drecha loke ta fout den trahamento di rijbewijs, un mocion cu a conta cu sosten di partidonan den coalicion y cu na momento di vota ta spera di por conta cu e sosten di henter Parlamento ya cu ta algo na bienestar ybeneficio di Aruba y nos hendenan.
Parlamentario Alan Howell Ex minister di Husticia a yuda strica 295 mil Florin
93