ORANJESTAD, Aruba –
Den fin di siman a tuma luga e prome competencia internacional di drone cu Vince Irie a organisa. Parlamentario di AVP Robert Candelaria tabata presente na e competencia aki, unda el a haya sa mas di e deporte di drone. E competencia a bay den un ambiente ameno y tur hende a pasa un rato agradabel. Durante e competencia el a tuma nota riba e extra factor cu tabata e biento fuerte cu a benta algun drone den lama. E tabata contento di por tabata presente na e prome competencia internacional di drone, unda a conta cu competidonan di Hulanda, Corsou y Aruba.A tene e competencia riba e tereno di ex Bushiri Hotel, cual tereno pa Parlamentario Candelaria ta un regalo bek p’e comunidad for di Aruba. Algun siman pasa hendenan tabata campa den e area di ex Bushiri hotel cu yen di ambiente y awo por uza e tereno aki pa deporte, pa haci e race drone riba nivel di internacional.
E competencia di drone tabata di FPV, esta First Personal View, asina Vince Irie, organisado di evento, a splica. E drone tin un camara y e competido tin un bril special pa asina aki nan por mira loke e drone ta mira. “Bo ta sinti manera bo ta den dje”, asina Vince Irie a expresa. A conta cu 4 participante di Hulanda, 8 di Aruba y 3 di Corsou.
Aunke e competencia tabata bayendo bon, e reto cu nan a topa cun’e tabata e biento fuerte di cual e dronenan por a handle esaki. Aunke p’e participantenan e parti fastioso di esaki tabata cu santo tabata bay den e control y no tabata manera na Hulanda unda cu awasero sa cay durante e competencia, pero nan a pasa un momento agradabel.
Esaki ta e prome competencia pero pa futuro ta kere cu lo tin participantenan hoben. “E problema ta pa bula drone racing ta basta dificil. Nan mester cuminsa cu e deporte y ta bulando pa un par di luna”, asina el a splica. Lo ta algo great pa hobennan di Aruba cuminsa cu e deporte aki cu ta uno nobo, di cual ta manera un video game pero na luga di ta sinta den sala e persona lo ta bulando un drone den naturalesa.