Home » PARTICIPANTENAN ENTUSIASMA CU NOS PRODUCTO TURISTICO ARUBA MEETS EUROPE 2018 TA DUNA IMPORTANCIA NA E MERCADO EUROPEO PA CU NAN PARTICIPACION DEN NOS TURISMO

PARTICIPANTENAN ENTUSIASMA CU NOS PRODUCTO TURISTICO ARUBA MEETS EUROPE 2018 TA DUNA IMPORTANCIA NA E MERCADO EUROPEO PA CU NAN PARTICIPACION DEN NOS TURISMO

by Admin
0 comment 52 views

ORANJESTAD— Ayera nochi na Renaissance Ocean Suites, Aruba Tourism Authority conhuntamente cu AHATA y AAA a duna bon bini na e conferencia bi-annual ‘Aruba Meets Europe’ (AME). Durante e evento aki tour operatornan y partnernan turistico strategico di diferente parti di Europa ta bishita Aruba pa conoce producto y desaroyonan di nos destinacion mas di cerca. E evento aki ta uno hopi importante pa crea, mantene y fortifica relacionnan Europeo, un mercado vital pa Aruba su turismo.

Durante un anochi tropical y cu e toke autentico di Aruba, Sr. Tirso Tromp – Area Director di A.T.A. Europa – a yama e 56 participante un caluroso bonbini na AME 2018. Por a nota presencia di entre otro Juan Thijsen Presidente di Parlamento di Aruba, Setty Christiaans-Yarzagaray Presidente di Comite di Turismo di Parlamento, Danguillaume Oduber Minister di Turismo – Salubridad Publico y Deporte, Chris Romero, Minister di Transporte, Comunicacion y Sector Primario, demas Miembronan di Parlamento, y otro invitadonan.

Durante e discurso di Minister Oduber, el a pone enfasis riba e importancia di e mercado di Europa, cu durante aña 2017 a trece mas cu 90.000 bishitantenan Europeo pa nos isla, cual na su turno ta duna un contribucion valioso na nos economia. Ademas, el a gradici tur esnan presente pa nan esfuerso continuo den bende y mercadea nos producto turistico cu awendia Aruba ta asina bon conoci den e continente di Europa. Tambe el a refleha riba e hecho cu awo vuelonan ta sali diariamente for di Hulanda cu –te ainda- ta e ‘main hub’ pa tur biaheronan Europeo. El a añadi tambe cu TuiFly tin cuatro vuelo semanal pa Aruba.

CEO di A.T.A., Ronella Tjin Asjoe-Croes a comparti durante su discurso cu “Europa ta un mercado cu a anota resultadonan tremendo pa nos industria turistico durante e ultimo añanan y pa e prome tres luna di 2018, unda cu tur mercado e crece y unda e region a crece cu 6% den e asina yama bishitantenan ‘stay-over’. Mercadeo progresivo y efectivo, esfuersonan den desaroyo di e producto turistico, combina cu cooperacion estrecho y lazonan fuerte entre socionan di Aruba y Europa a contribui na e logronan aki durante e ultimo añanan. No obstante e resultadonan positivo aki, Aruba no ta para keto y ta sigui continua na fortalece desaroyonan den esfuersonan di mercadeo y den desaroyo di e destino.

E region Caribense ta sigui crece, primariamente pa hotelnan nobo cu ta wordo construi den e region. Den e caso di Aruba, manteniendo su posicion como un destinacion lider den turismo -den e region- di acuerdo cu e vision di Aruba su turismo ta basa riba; aumenta den entrada pa medio di turismo proporcionalmente mas cu aumenta den volumen di bishitante.”

Minister di Turismo, y CEO di A.T.A. a gradici tur participante pa nan aporte continuo.
Durante e anochi aki por a nota varios operador nobo, cu ta nifica negoshi potencial nobo pa Aruba. Tambe presente ta socionan fiel cu aña aden aña afo ta respalda nos producto den diferente pais Europeo. Mas cu claro socionan clave local tambe a forma parti di e evento di bonbini.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio