Tin cosnan cu a bay hopi robez den Lotto y durante reunion publico Minister Danqui Oduber lo trece prueba
Durante Conferencia di Prensa di Fraccion MEP Parlamentario Endy Croes a divulga cu tin cosnan pisa contra Bestuur di Lotto. Segun por a compronde cu ta fiesta tin bou di e tent y ta pa e motibo aki nan ta usando un Professor Kunneman kende segun fuente ta strica 1000 dollar pa cada ora pa asina tapa e fechorianan di e sinberguensanan aki. Ta Monster cu Djaca ta manehando Lotto pa Deporte. Tur miembro di Bestuur ta mesun culpabel y responsabel pasobra tur pa mas di 8 aña a tapa y sconde pa otro. Parlamentario Croes a manda un serie di pregunta como e organo di mas halto, esta Staten di Aruba mediante e Minister di Deporte pa Lotto, pero lamentablemente por a compronde cu te cu awe na vispera cu e Reunion Publico ta cla pa cuminsa no a ricibi contesta. Esaki ta un falta di respet total y sigur no lo wordo acepta.
A chica miyones di Lotto
Minister Danqui Oduber sinembargo a informa Parlamento cu e tin hopi informacion di iregularidadnan cu a y ta tumando lugar den Lotto y esakinan tur lo bira publico durante e reunion di Parlamento. Te hasta e bestuur a corumpi cierto empleadonan pa tene nan contento y keto. Bestuur aki a maniobra pa paga empleadonan den servicio di Lotto sumanan extra banda di nan salario na diferente ocasion mientras Bestuur tabata chica miyones for di Lotto y asina ningun hende cu tin acceso pa wak y compronde kico ta pasando lo no papia. Como antesala mi ta duna un ehempel. Melissa Kartoredjo, empleada fiho na Lotto a cobra Afl. 4300 florin extra mientras Angelina Carolina Feliciano a cobra Afl.7000 banda di nan salario pa haci e mesun trabao cu nan ta haci tur dia. Asina tin diferente pago mas a bay pa e dosnan aki di Staff. Accountant di Lotto a suta Afl.150.000 mientras ta book pa professionele kosten un otro Afl. 300.000 florin sin conta Juridische Kosten di Afl. 225.000 florin. Tur esaki den un solo aña. Un ehempel di bonus di Pasco pa un compania di IT di Arnold Le Grand amigo intimo di Mike De Meza ta cobra riba 24 di december Afl. 12.725 florin y algun siman promer ta strica Afl. 9120,-. Esakinan ta masha tiki di locual nos por a compronde cu e Minister tin pa presenta na Parlamento.
No tin transparencia den Lotto
Nos ta spera cu durante e reunion aki tur cos lo sali na cla y e sinberguensanan cuminsa prepara pasobra nan dia ta conta. Esaki ta conta pa e Hulandes Professor Kunneman tambe. Ta hopi tin cu a strica Miyones den Lotto. Abogado Da Sousa casa di ex Parlamentario di AVP Desiree, Abogado Kloes, Abogado Carlo, Abogado Peterson casa di Baba Herde di AVP. Pues asina e liña cora ta core usando masha hopi bogado pa trata na legalisa e forma di proceder malo. No tin transparencia y tampoco Good Governance den Lotto pa deporte. Esaki ta liña recta contra e vision y maneho di e gobierno actual. Pueblo, keda pendiente pa bo cera conoci cu e berdadero MONSTERNAN manehando placa di Deporte.