Home Local Mayornan ta bay polis pa un caso serio di bully na EPB...

Mayornan ta bay polis pa un caso serio di bully na EPB Hato

Hato: Dialuna pa mas o menos 1’or y mey di merdia, mayornan di un mucha homber di 15 aña, kende ta alumno di EPB, ta wordo poni na altura cu nan yiu homber ta victima di maltrato, menasa y bully na scol.

Hoben su cuero kima cu Grazy Glue
Segun e mayornan dialuna mainta pa mas o menos 9’or y 45, un alumno of alumnonan a dicidi pa basha crazy glue patras di nan yiu homber su garganta y nan a press esaki y wantando e cu su uniform di gym, despues nan ranke y a ranca un pida di su cuero, segun dokter ta trata di kemadura di prome grado.

Mayornan ta wordo informa di abuso
Dialuna den oranan di merdia, mayornan di e alumno ta ricibi un yamada di un amiga di cas, kende ta informa e mayornan cu tin abuso ta tumando lugar na scol y cu nan yiu homber ta victima di abuso. Tambe nan ta wordo informa cu nan yiu homber ta wordo menasa y pa e motibo aki, e ta keda keto y no ta bisa nada di loke ta pasando cune. Asina aki e mayornan ta haya mas informacion, cu siman pasa nan a purba kima nan yiu homber su cabey cu un lighter. Enberdad e mayornan a ripara den su cabey, e partinan kima.

Como mayor nan a keda hopi preocupa y a dicidi di bay polis, paso esaki no ta bullying so, esaki ta bay mas leu ta trata di abuso, maltrato y menasa tambe.

No ta descarta cu lo por tin mas victima di bully na e scol
Como mayor nan ta sinti hopi dolor pa haya tende con nan yiu ta wordo maltrata, pa otro alumnonan na scol. E mayornan a haya sa cu e alumnonan aki a spuit nan yiu cu algo cu a bira biña ora ela cay riba su cuero. E mayornan a bisa di tin hopi duele, paso tin hopi mucha keto ta bay e scol aki y ken por bisa si un di nan tambe lo por ta victima di bully, maltrato of menasa y tambe ta keda keto.

Keho oficialmente entrega y ta den man di recherche di KJZP
Dialuna merdia e mayornan di e victima hunto cu polis a bay na e scol, pero e tres alumnonan cu ta bezig ta bully nan yiu no tabata na scol mas. E mayornan a bay entrega un keho oficial na autoridad y e caso di bully aki ta den man di recherchenan di e departamento di KJZP, pa mas investigacion.

Bully ta wordo semper gelink cu consecuencianan negativo
Bully por tin consecuencia pa tur hende, esnan cu ta wordo gebullied of esnan cu ta bully otro y te hasta otro cu tabata testigo di bullying. Bullying ta wordo hopi biaha gelink cu consecuencianan negativo, incluyendo impacto riba salud mental, riba uso di substancianan prohibi y te hasta cu suicidio. Pesey ta hopi importante pa mayornan papia cu nan yiu pa determina si e por ta victima di Bully of si ta algo otro ta por ta su preocupación.

Consecuencianan pa muchanan cu ta victima di bully
Muchanan cu ta victima di Bully, por experiencia hopi biaha depression, anshamento, e gevoel di ta tristo y di ta sinti bandona ta bira mas grandi, cambio den patronchi di drumimento y comemento, perdemento di interes den actividadnan cu antes nan tabata gusta. E cuestionnan aki lo por persigui e victima te ora e bira un adulto. Problema di salud, perdemento di interes den sigui studia, di participa na actividadnandi scol. Mayoria parti nan ta cuminsa perde les, no kier bay scol y hopi biaha ta drop out.

Futuro comportacion hopi biaha di muchanan cu ta bully otro
E muchanan cu ta bully otro mucha, hopi biaha ora nan bira adulto, nan lo por ta involvi den asuntonan den cual violencia lo por hunga un rol. Por ehempel nan por bira alcoholico, of adicto na droga den nan hubentud y como adulto. E muchanan cu ta bully, como hoben of adulto facilmente lo por hayanan involvi den peleanan, nan lo por ta involvi den casonan di vandalismo. Nan mayoria biaha tambe ta dropout di scol.
Esnan cu ta bully otro mucha, ta cuminsa na un edad mas hoben cu actividadnan sexual. Hopi biaha esnan cu ta bully, na grandi lo por tin un comportacion abusivo contra nan pareha, nan casa of yiunan.

Mayornan y educadornan bati alarma prome cu ta laat
Victima di bully por tin e tendencia di comete suicidio, esaki na varios ocasion a yega di pasa caba, pesey ta hopi importante pa mayornan papia cu nan yiunan y si tin un duda cu bo yiu por ta victima di Bully, bay scol y papia cu e director of maestronan, bishita dokter di cas etc., nan lo por guia mayornan con pa deal cu casonan di bully.

Bully tin hopi consecuencia riba futuro di un hoben of un mucha, pesey ta importante pa bati alarma trempan, paso e problema aki mester wordo atendi mas liher cu ta posibel pa asina evita consecuencianan devastador pa e victima di bully. Tambe si mayornan of maestronan etc. ta nota cu nan yiu of alumno ta bully otro mucha, tambe mester bati alarma pa nan, paso e hoben of mucha aki tambe lo tin mester di ayudo.