Home Sports E di 4 edishon 12 Hours of Aruba den un ambiente International

E di 4 edishon 12 Hours of Aruba den un ambiente International

Check di Afl 1500,00 pa Kapel Alto Vista

Oranjestad – E di 4 edishon den e competencia di mountainbike 12 Hours of Aruba ta tras dilomba. Na inicio di e careda diasabra tardi pa 6 PM, a raporta un cantidad di participantenan international for di paisnan manera: Curacao, Colombia, Venezuela, Argentinië, Estados Unidos, Hulanda y sin laga afo Aruba. 12 Hora largo te cu salida di solo diadomingo mainta 6 AM nan a bataya fuertemente contra otro den cercania di Alto Vista pa logra gana diferente tipo di premionan cu tawata tin disponibel. Un remarkable ganador tawata Victor Vrolijk kende a core un buelta den e tempo mas rapido di 11 minuut y 23 seconde.

E buelta mas rapido a wordo registra danki na e systema digital MyLaps (di Patrishi Sport) cu tawata registra tur tempo y buelta di cada coredor/equipo individual. Mediante e systema aki lo por a keda registra un ‘fotofinish’ den e categoria Men 4. Cu un diferencia minimal (despues di a core 55 buelta caba) tawata e ultimo coredor di FX Team y e ultimo coredor di Tri-Bike cu algo promer cu 6 AM di diadomingo mainta a bataya fuertemente tur cu tin contra otro pa mira kende lo crusa e liñea final como ganador. Aki tawata e coredor di FX Team cu apenas 200 milli-seconde di diferencia a crusa e liñea final prome, bow grito y apoyo di tur presente,

E ‘Escenario’
E ambiente crea pa e evento aki tawata un magestral, un escenario traha parti panort/pabow di Kapel di Alto Vista. Tur equipo tawata tin na propio tentnan unda cu nan a pasa henter anochi, apoyando tur coredornan, cu musica di DJ cu a percura pa un selecion di musica bon anima. Mediante un ‘brug’ (instala pa Scaff-Pro y FX) publico presente por a crusa bin meymey den e tentnan sin tin cu stroba e coredornan ora cu esakinan ta hasiendo e cambio. Tur cu a para riba e ‘brug’ aki tawata tin un bista
bunita y completo di e evento. Cuminda y bebida tawata na encargo di e compania di catering Chicken & Lobster. Crusa Cora tambe tawata presente pa brinda asistencia si esaki tawata necesario y Flora a percura pa un ambiente ‘natural’.

Dos coredor individual
E coredornan tur a participa den equipo 2, 4 of 6 persona, cu excepshon di 2 coredor. Durante e evento – cu aprobashon di e organisadornan – a participa e aña aki dos coredor individual. Danny Felix a core pa un bon causa esta pa e Fundashon Horses of Hope Aruba y a logra core 37 buelta. Wendy van Bergermeer tambe a core pa un bon causa esta Caribbean Urban Search and Rescue Team y a logra core 23 buelta.

Ganadornan
E careda a cuminsa diasabra atardi 14 april pa 6 PM y tur equipo a core e systema di relevo. Un coredor di cada equipo tawata core un buelta di un tiki mas cu 4 kilometer, te ora yega e momento di hasi e cambio cu un otro miembro di su equipo. Diadomingo mainta 15 di april pa exactamente 6 AM e fin di e careda a wordo indica por medio di un sirena. Coredornan cu tawata riba e ruta na e momento
ey por a caba nan buelta.
Den e categoria ‘Men – Duo’ a gana FX Gigantes cu 54 buelta
Den e categoria ‘Men 4’ a gana FX Water Army cu 56 buelta
Den e categoria ‘MixTeam 4’a gana Tri-Bike Team 2 cu 54 buelta
Den e categoria ‘Men 6’ a gana FX cu 49 buelta
Den e categoria ‘Mix Team 6’ a gana Coburg Shoko cu 46 buelta
Riba nos pagina di Facebook 12 Hours of Aruba tin un link unda por aprecia e resultadonan complete di e ganadornan y tambe tin hopi mas potret pa mira.

Premionan special
E aña aki e organisadornan a otroga un premio special na Victor Vrolijk kende a core un buelta di +4 kilometer den 11 minuut y 23 seconde. Esaki tawata e buelta mas rapido cori pa e anochi aki. Tambe Loren Muffat a haña un premio special, ganando asina cu e mountainbike mas bunita dorna cu lusnan Neon. Por ultimo tur participantenan tawata tin un chance di gana un Mountainbike di marca Cannondale Trail 4 nobis nobis por medio di un ticket cu nan a ricibi ora di a inscribi. E felis ganador a resulta di ta e joven Gyandric Werleman di Hubada Cycling Team kende por a hiba e mountainbike nobo aki cas diadomingo mainta.

Kapel
E evento di 12 Hours of Aruba ya a wordo organisa den cercania di Alto Vista pa 4 aña consecutivo. E organisadornan tin bon contacto cu Robert JeanD’or kende ta esun responsabel pa e maneho di e kapel. Diadomingo mainta e la ricibi un bunita check pa e suma di 1500 florin. E organisadornan por mira riba un exitoso cuatro edishon di ‘12 Hours of Aruba’, y ta spera di por organisa esaki un biaha mas den 2019.

==== Media info ====
Potret
#1 Coredornan individual Danny Felix y Wendy van Bergermeer
#2 Ganadornan Men 2
#3 Ganadornan Men 4
#4 Ganadornan Mixed 4
#5 Ganadornan Men 6
#6 Ganador ‘buelta mas rapido’
#7 a + 7b Ganador ‘Neon Bike’
#8 Gyandric Werleman di Hubada Cycling Team a gana un Mountain Bike nobis nobis
#9 Robert JeanD’or di Kapel Alto Vista ricibiendo e check di 12 Hours of Aruba
Personanan di contacto pa prensa ta: Edwin Hekman (5922506) y Jeroen Simons (6626171)
Por manda email na: 12hoursofAruba@gmail.com
Pa mas informashon por bishita nos pagina web: 12HoursofAruba.com y nos Facebook pagina.