AHATA den colaboracion cu Bossi Security a organisa seminario di “Crisis Management Planning”
ORANJESTAD, Aruba: Recientemente miembronan di Aruba Hotel & Tourism Association (AHATA) a participa na un seminario di Crisis Management Planning, presenta door di Bossi Security Aruba. A comparti hopi informacion riba siguridad y con pa plania un maneho di crisis. Tema di e seminario tabata “Strategic Crisis Management”. Aaron Antersijn, kende ta “Senior Security Consultant” di Bossi Security Aruba, tabata e facilitado.
A mustra con pa traha un “Crisis Management Plan” pa miembronan di AHATA, cual tabata manera, hotel, retail, companianan di seguro, companianan di tour, Aeropuerto y hopi mas. Ta importante pa tin un plan di maneho di crisis. E idea di e seminario aki tabata pa tur hende comparti nan conocemento cu otro, mientras cu Bossi Security Aruba ta duna e luz cora di kico nan mester. Tambe kico ta e componentenan di un plan asina aki pa si ora di presenta un crisis, con pa responde riba e crisis, con pa atende e crisis y esunnan cu ta afecta den dje. Aaron Antersijn, ta reintera pa tur empresa grandi y chikito percura pa tin un plan pa asina por ta tin un responde cla pa si un crisis presenta. Esnan cu no tin nan plan ainda of no por traha un plan semper y cuando por tuma contacto pa asina haya e asistencia necesario.
E seminario tabata basta “hands on” y cu hopi interaccion di e participantenan. Hopi hende cu tin yen di experencia y a pasa den diferente crisis caba a comparti nan experencia y conocemento cu parties den e industria turistico, cu kisas no a pasa dor di un crisis ainda.
Aurelia Croes, Quality Manager di Barceló Aruba, tabata un participante na e seminario y tabata contento cu AHATA a organisa esaki. E ta kere cu mester di tipo di seminarionan asina aki. El a indica cu e “Crisis Management Plan” ta algo importante, specialmente nan cu ta traha den sector turismo. Mester tin un plan pa si algo pasa, pasobra semper ta biba cu e pensamento cu nada lo pasa. Ta bin huespednan aki cu ta spera cu e hotel por tin un plan cla si acaso algo sosode y con pa atende cu esaki.
Pa Johnny Kock, Loss & Found Prevention Manager di La Cabana Beach Resort & Casino, e seminario tabata hopi interesante pa motibo cu si no tin un crisis plan of management plan, dia cu algo pasa riba e propiedad, e personal no lo ta prepara pa algo asina. “Mi ta hopi contento cu e presentacion aki. Pa esunnan cu no tin e, no tin un plan in house, pa nan cuminsa pensa riba un plan”, el a indica.
Pa La Cabana Beach Resort & Casino ta facil pa traha un plan di crisis, pa motibo cu nan tin un oficina principal cu ta facilita nan cu hopi informacion pa traha e plan di crisis. Esaki ta pone cu nan mester adapta e plan di crisis a base di Aruba y e factornan ta un tiki diferente. Di por tabata presente na e seminario aki, nan por a comparti cu otro coleganan y propiedadnan kico tur nan ta haci cu por yuda cu nan plan. Pero tambe kico e otronan ta haci pa asina nan tambe por acapara e situacionnan cu por tin na Aruba.