Home » Parlamentario Sue-Ann Ras (MEP): ‘Evento Arte di palabra ta bon evento pa promove Papiamento y literatura’

Parlamentario Sue-Ann Ras (MEP): ‘Evento Arte di palabra ta bon evento pa promove Papiamento y literatura’

by Admin
0 comment 64 views

ORANJESTAD – E fin di siman aki un cantidad di 41 hoben a participa den e competencia di Arte di palabra di Aruba. E biaha aki e tabata uno mas special, mirando cu ta trata di e di 10 biaha y cu ta prome biaha cu ta tene e festival aki na Aruba den e forma aki, unda cu a conta cu participacion di Corsou y Bonaire tambe. Parlamentario Sue-Ann Ras (MEP) ta bin di e mundo di enseñansa y particularmente e materia di idioma Papiamento. Pa Ras, esaki tabatin un nificacion mas special ainda. “E ta un bon forma pa un hoben hunga cu palabra, pensamento, creatividad y contenido, incluso ta critico riba e sucesonan social di nos comunidad”, Ras a cuminsa na bisa.

FORMACION
Ras, como experto riba e tereno di Papiamento, conoce e importancia di formacion di uzo di idioma materna, unda cu un base grandi ta inclui placer den lesamento. No ta un secreto cu nos no tin un cultura di lesamento y netamente lesamento ta brinda un mucha, hoben y adulto ampliacion di vocabulario, reflexion di idioma, ampliacion di horizonte personal y creatividad. “P’esey mes ta di sumo importancia pa nos stimula tanto Papiamento y literatura na scol y na cas. Contamento di storia ta ideal pa inculca for di chikito caba. Buki of contamento di cuenta ta trece curiosidad y placer den lesamento y tur mayor y adulto por contribui na esaki na un forma completamente gratis. Ainda mi ta corda con mi defunto welo tabata gusta conta nos storia merdia, pa nos drumi”, Ras a sigui bisa.

BALORA NOS HOBENNAN
E parlamentario, cu tabata presente na e evento importante y na final a hasta keda encarga cu entrega di premio na e ganadornan, sinembargo a lamenta, cu e sala no tabata completamente yen compara cu Corsou. Asina mes, Ras ta contento cu e evento aki a tuma lugar, specialmente e aña aki, unda cu ta celebra 15 aña di oficialisacion di e idioma Papiamento y e di 10 biaha cu ta organisa e evento Arte di Palabra na Aruba. Ras a felicita no solamente e ganadornan di e anochi bunita aki, sino tambe e organisadornan pa nan empeño, dedicacion y trabou den promove nos idioma Papiamento y tambe nos cultura.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio