Home » Parlamentario Robert Candelaria Minister a priminti mas polis pero den presupuesto tin cero polis

Parlamentario Robert Candelaria Minister a priminti mas polis pero den presupuesto tin cero polis

by Admin
0 comment 50 views

Presupuesto 2018 entrega pa gobierno Wever Croes na Parlamento, ta bolbe confirma e vision di partido MEP caminda nan ta mustra claramente cu ‘campaña ta un cos y goberna ta otro cos,’ Parlamentario pa fraccion di AVP, sr Robert Candelaria ta mustra.
Minister di Husticia Andin Bikker durante di campaña electoral a priminti y sigura pueblo cu den su prome 100 dia den gobernacion di e pais, lo pone 200 polis extra riba caya como parti di su plan contra criminalidad riba nos isla.
“Sinembargo kico nos por mira awor den e presupuesto di husticia entrega pa gabinete Wever Croes, cu ningun caminda por mira fondo extra poni pa logra esaki, cero florin y al contrario ta baha e suma cu tin presupuesta pa ‘werving’ di polis nobo, pues salario ta keda igual, ta baha gasto di werving y no esey so pero ta baha gasto di ‘overtime’ presupuesta cu 4.2 miyon florin.
Ora cu lesa esaki ta duna nos e impresion fuerte cu Minister Bikker tambe ta ehecuta e filosofia di ‘campaña ta un, goberna ta otro’ pasobra e mandatario aki durante di campaña electoral a priminti pueblo 200 polis den 100 dia y den presupuesto ta duna 0 polis pa henter aña, ta baha placa pa overtime di polis presupuesta y ta baha placa pa ‘werving’ presupuesta, pues intencion di e minister ta di pone 0 polis y no 200 polis.
Awor cu esaki nos por mira un ehempel hopi cla di un Minister cu a tuma un cartera cu e no ta compronde kico e tin cu haci, esaki a bisto na e tipo di detayenan aki.
Loke ta dificil pa compronde ta e hecho cu e Minister di Husticia ta kita placa pa overtime, ta kita placa pa haya mas polis, keto bay e ta sigui bisa cu e lo pone mas blauw, mas polis riba caya mientras cu den su presupuesto esaki no por wordo mira ningun caminda.
Na mes momento nos por mira den e presupuesto cu Minister di Husticia ta bay saca mas polis y pone nan na otro departamentonan hudicial, sacando nan for di servicio di surveillance, sacando nan for di uniform blauw, e ora e mandatario ta contradeci su mes den un forma cu e lo no por splica of hustifica y ta algo cu e no por coregi of drecha esaki mas.
Pues ta bay kita hende for di riba caya, ta manda nan pa otro departamentonan, no ta bay tuma mas polis den servicio y ta dicidi di baha overtime di polis, pero ta sigui priminti pueblo cu lo bay tin mas blauw riba caya.
Ta algo cu no ta bay y nos ta hopi preocupa cu esaki ya cu na e momentonan aki no tin suficiente blauw riba caya, tin mucho tiki hende disponibel pa esaki, y pa colmo awor tin un grupo cu lo wordo ‘uitgeleend’ na otro departamento, tin un grupo den ‘opleiding’ pues ta muestra cla cu polis no tin suficiente hende, loke sin duda ta motibo di gran preocupacion,” Parlamentario Robert Candelaria a declara.

El a sigui señala cu den e presupuesto cu Parlamento a ricibi pa 2018, tampoco tin señal of placa pa otro promesa cu Minister Bikker a haci durante di campaña electoral, esta di pone alarma na tur cas y camara di grabacion den cayanan rond Aruba pa yuda combati criminalidad.
Tur storia cu e minister a conta pueblo prome cu eleccion ta duna e impresion cu esakinan tabata un ilusion di un politico cu su deseo pa bira minister tabata mas grandi cu interes di pueblo.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio