Home » Parlamentario Endy Croes di MEP: Robert Candelaria y Mike Eman mester paga pais Aruba bek placa usa pa ‘Dienstreis’

Parlamentario Endy Croes di MEP: Robert Candelaria y Mike Eman mester paga pais Aruba bek placa usa pa ‘Dienstreis’

by Admin
0 comment 77 views

Parlamentario Endy Croes preparando pa trata begroting e siman aki a dal den mas cos di sinberguensa. Repasando documento y haciendo pregunta a bin tuma nota di un acto sin gevoel y acto di sinberguenseria di tanto Robert Candelaria y tambe Mike Eman. Parlamentario Croes durante conferencia di prensa di Fraccion di MEP a splica cu nunca e por a biba kere cu tin hendenan cu ta bishita Iglesia, ta cana rond cu cara di santo, brasa hende, aparenta di ta un bon hende, pero na mesun momento nan ta tira atraco riba caha di pueblo na un manera clandestino y ta purba legalisa esaki. Net e persona encuestion ta un persona cu a sirbi husticia y mester por sa mucho miho.

Biahenan riba custia di pueblo
A bin sali na cla cu sr. Candelaria di AVP den aña 2017 tabata residencia na Corsou y a biaha pa Aruba tanto na luna di Juni como tambe luna di Juli, un total di cuater (4) biaha. E fechanan exacto ta 28 di Juni, 4, 21, 27 di Juli 2017. Dia 27 di Juli el a bin Aruba pa di cuater biaha y a keda pa entrega lista 4 di Augustus 2017. Locual ta mas preocupante cu tur e cuater biaha Pais Aruba a paga e gastonan como dienstreis y werkbespreking. Candelaria no tabata den servicio di gobierno na e momentonan ey y a drenta servicio di gobierno como coordinador apenas 15 di Augustus 2017. Pues ta hopi cla cu Candelaria tabata tin su werkbesprekingnan den Cas di partido AVP negociando su number riba lista di AVP, su contract di Afl. 8000 pa luna como coordinador y alaves su puesto como Directeur di Directie Scheepvaart cu un salario di Afl. 25 mil pa luna. Tur contracto tabata cla y firma pero gracias na e resultado di eleccion e contracto como directeur di Scheepvaart firma dia 1 di october 2017 pa Mike Eman a wordo cancela pa e gobierno actual.

Ta basta cu corupcion di AVP
Hecho tras di tur esaki cu nos kier ilustra ta cu a carga tur e gastonan di biahe di Candelaria riba cuenta di Aruba como dienstreis y werkbespreking cual hamas ta asina y ta bishitanan pa reuni cu partido politico AVP. Parlamentario Endy Croes ta pidi encarecidamente na Parlamentario Candelaria pa e paga pais Aruba esaki bek. Si bo no tin e recibonan mi lo percura pa bo hayanan. Si no bin reaccion lo inicia proceduranan legal contra Candelaria y Mike Eman kendenan ta esnan responsabel pa esaki. Ta basta cu actonan coruptivo y di sinberguensa di e taya aki! Croes ta termina bisando ta ki sorpresa mas nos lo topa cu ne den dianan nos dilanti? Dios spaar Aruba di tipo di mentalidadnan asina.

 

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio