Parlamentarionan di AVP ta yora pa mas dia pa studia presupuesto pero mira nan oficina
Parlamentario Endy Croes a reacciona riba e yoradera di Parlamentarionan di AVP relaciona cu tratamento di presupuesto 2018. Diabierna ultimo tabata e deadline pa Parlamentarionan di tur Fraccion entrega nan preguntanan por escrito. Sinembargo desde siman pasa nos a tende parlamentarionan di AVP yorando den prensanan comprometi cu e 7 dia cu Parlamento a bay di acuerdo cune pa nan haci pregunta no ta suficiente. Sin mas mester recorda mesun parlamentarionan aki y algun di nan ex ministernan cu na 2014 bin ariba AVP tabata bulldoze democracia dunando oposicion e tempo aya apenas 2 dia. Claro cu nos lo no paga malo cu malo pero 7 dia sigur ta suficiente y dado caso bo lubida di haci algun pregunta bo por haci esaki durante e reunion publico.
Nunca AVP ta na trabao
Locual a hala mi atencion enormemente ta e hecho cu net esnan cu ta yora no ta presenta na trabao. Tanto Benny Sevinger, Arthur Dowers y Mike De Meza nunca pero nunca ta na trabao. Nan ta yega solamente ora tin reunion publico pero por lo demas nan no ta atende NINGUN di e reunionnan manera di Vaste Commissie. Tampoco nan no ta atende reunionnan di Comision Central. Asina tin diferente reunion tur siman den Parlamento pero nunca nan no tey. Desde nan encargo como Minister nan a wordo categorisa como corupto y sinberguensa pa e manera cu nan a masacra Aruba y a percura pa manda nos debe nacional di 41.7% di GDP na 2008 pa 93%. Sin mester papia mes di e corupcion di siglo di terenonan comercial. Tur Parlamentario tin nan lessenaar normalmente carga cu documento como cu esey ta trabao di Parlamento, esta di lesa documentonan y controla Gobierno.
Oficinanan bashi bashi
Desde 17 di November 2017 cu tanto Benny, Dowers y De Meza a huramenta como Parlamentario nan rol como minister esta di manda y maneha a cambia y kisas nan ta expresa nan disgusto door di No presenta na trabao. Pueblo a manda e señal cu fiesta a caba. Pueblo tin derecho di sa kico ta pasando, pasobra No por ta asina cu pueblo ta paga e tiponan corupto aki sin cu nan ta presenta na trabao. Solamente durante reunion publico nan ta presenta un rato pa haci show of drama y nada mas. Pa por prueba nos reclamo nos ta publica adhunto potretnan recien tuma den luna di April 2018 unda por mira claramente cu nan oficina, cashi etc ta bashi bashi. Por compara esaki cu Coleganan di Fraccion MEP cumpliendo cu nan deber preparando pa presupuesto 2018. Pueblo Huzga pa Bo mes!!!