Home Politics Parlamentario di Fraccion AVP Robert Candelaria a reuni cu ministerio di AWANA

Parlamentario di Fraccion AVP Robert Candelaria a reuni cu ministerio di AWANA

Trahando cu iglesianan ta yuda preveni criminalidad
Fundacion OANSA ta pa yuda muchanan den barionan

ORANJESTAD, Aruba: Parlamentario di Fraccion di AVP, Robert Candelaria, a reuni cu algun persona di AWANA Internacional, kendenan ta na Aruba. Nan a bin pa asina train lidernan na Aruba con pa traha cu hobennan den bario. Durante campaña Parlamentario Candelaria a indica cu ta desea di traha cu iglesia- y fundacionnan pa asina yuda den e area di prevencion.

AWANA ta un organisacion cu ta bezig ta bay cu tempo, unda cu nan ta buscando formanan con pa drenta y traha cu e muchanan den e bario. Asina aki ta logra yuda nan, di cual ta bezig cu deporte, bezig cu palabra di Dios, bezig cu arte. Na un manera creativo ta duna nan “bezigheden” cu ta tene e muchanan ocupa pa haci malo riba caya, pero e ta algo productivo y constructivo.

Na aña 2001 OANSA a cuminsa na Aruba, pero na aña 2009 Robert Candelaria hunto cu otro 2 persona a lanta e fundacion di OANSA cu e idea pa promove esaki na Aruba. Poco poco e cantidad di clubnan ta creciendo, asina el a indica. Pero impacto cu kier logra ta mira e cantidad di muchanan cu ta envolvi den e programa ta crece y tambe con esaki ta afectando e muchanan den nan comportacion, den nan bida na cas cu nan mayornan, na scol. Esaki ta algo cu e ta kere cu mester sigui promove pa asina por yuda e hobennan tuma e miho caminda y asina aki ta preveni criminalidad.

David Bailey, Regional Ministry Director – Caribbean, di AWANA Internacional ta na Aruba unda cu su persona y su colega Miguel Perez a reuni cu diferente iglesia y “key leaders”, pa asina comparti mas con AWANA por yuda e “key leaders” aki di comunidad pa yega y haci un impacto na e muchanan di e siguiente generacion di Aruba. E experiencia di David Bailey aki na Aruba tabata great unda cu e lidernan, pastoor, educadornan di Aruba sa cu e recurso valioso cu tin no ta e isla bunita, e lama bunita, e santo blanco pero e recurso mas grandi ta e muchanan cu ta e siguiente generacion.

E motibo principal di e bishita di AWANA ta pa inspira iglesia y pueblo di Aruba pa lanta un generacion nobo profundo den balornan, funda den Dios y bijbel, asina Miguel Perez, director di Ministerio Latino Americano y Hispaniola, a expresa. Nan kier crea un sentido den hende no solamente pa presente, futuro of pa nan mes, pero crea sentido pa nan mesun famia.
Hobennan ta desconecta di nan famia door di tecnologia di cual Miguel Perez ta kere cu esaki por ta algo sublime y tambe desastroso. Via tecnologia por brinda trainingnan excelente, conexion excelente cu hendenan cu propositonan realmente relevante. Tambe por topa cu cosnan no adecua y p’esey nan ta kere cu un asunto importante pa saca mayor probecho di tecnologia p’e hobennan, ta di tin e mentor con pa haci uzo di tecnologia miho. Ta facil pa un hende desconecta y keda den su mesun mundo, pero esey no ta yuda niun hende, asina el a termina bisando.

AWANA ta un ministerio cu a cuminsa 65 aña pasa na Merca, di cual den e ultimo 10 pa 20 añanan nan a enfoca nan mision di sirbi comunidad door di provee trainingnan na lidernan y con pa trata cu e siguiente generacion. E lidernan di Aruba ta kere cu muchanan ta e recurso mas grandi di comunidad.